Krefst þess að Jón Arnar víki vegna tengsla við PwC

„Þetta er allt fremur óheppileg staða,“ sagði Reimar í þinghaldinu í morgun. En aðalmeðferð í málinu var frestað vegna upplýsinga um tengsl Jóns Arnars við málið.

Árin 2005 til 2007 var Jón Arnar, sem er endurskoðandi, yfirmaður eftirlits með beitingu alþjóðlegra reikningsskilastaðla (IFRS) hjá ársreikningaskrá. Lýtur málið að aðkomu hans að málsvörn endurskoðunarfyrirtækisins Price Waterhouse Coopers (PwC) í lögsókn slitabús Landsbankans.

300 hluthafar af öllum stærðum

Vanhæfismálið er í raun sér mál innan hópmálsóknarinnar sem hófst árið 2015 en á í raun rætur allt til ársins 2012 þegar Vilhjálmur Bjarnason hóf vitnamál gegn Björgólfi. Um 300 fyrrverandi hluthafar í Landsbankanum, bæði litlir og stórir, telja að Björgólfur hafi leynt upplýsingum um umsvifamiklar lánveitingar honum tengdar. Einnig að Björgólfur hafi brotið yfirtökuskyldu þegar eignarhaldsfélag hans, Samson, hafi náð fullum yfirráðum í bankanum um mitt ár 2006.

Alls eru fimm félög í málaferlum við Björgólf. Málsóknarfélög hluthafa Landsbanka Íslands númer I, II og III sem krefjast viðurkenningar á bótaábyrgð Björgólfs. Einnig Fiskveiðihlutafélagið Venus og Hvalur, bæði undir forsvari útgerðarmannsins Kristjáns Loftssonar, sem krefja Björgólf um bætur að höfuðstóli 600 milljóna króna.

Málið hefur þvælst fram og aftur í réttarkerfinu í allan þennan tíma. Margir dómarar hafa komið að því og fyrirtökurnar eru orðnar mýmargar. Gert var ráð fyrir að aðalmeðferð hæfist loksins í þessari viku en hún á að taka tvær vikur. Ein vika í vitnaleiðslur og ein í málflutning. Það varð ekki því að upplýsingar bárust um mögulegt vanhæfi Jóns Arnars og tefst málið því enn frekar.

Vitni lét vita

Í fyrirtökunni í morgun sagði Reimar að kröfur um sérfróða meðdómendur væru ríkar og að í dómaframkvæmd hefði þeim verið vikið frá við minnstu snertingu við mál. Sagði hann að Jón Arnar hafi veitt PwC ólögskyldar leiðbeiningar vegna atriða er varði sakarefni hópmálsóknarinnar og óheppilegt væri ef það kæmi upp í aðalmeðferð málsins.

Fyrrverandi slitarstjórnarmenn yrðu leiddir fyrir til vitnis og ábyrgð PwC væri „samslungin sakarefninu.“ Hafi það verið vitni í málinu sem fóra að efast um hæfi Jóns Arnars og lét vita.

Jóhannes Bjarni Björnsson, lögmaður hluthafanna, gerði ekki kröfu í vanhæfismálinu. Hann sagði hins vegar að sakarefnið snerist ekki um ábyrgð PwC heldur Björgólfs, sem hafi „veitt rangar upplýsingar og blekkt endurskoðendurna.“

Jóhannes Rúnar Jóhannsson, dómsformaður í málinu, lét bóka að Jón Arnar hafi að eigin sögn ekki komið að reikningsskilum Landsbankans á þeim tíma sem um er fjallað. Né neinir starfsmenn sem undir hann heyrðu.