Leggja slagorðinu þar sem æ fleiri skilja ekki til hvers sé vísað

Atli Ísleifsson skrifar 26. mars 2023 10:00

Hakkbollur í nýjum umbúðum og Chili con Carne-réttur í eldri umbúðum í hillu matvöruverslunar fyrr í vikunni. Vísir

Sláturfélag Suðurlands hefur á undanförnum vikum kynnt til sögunnar nýtt útlit á 1944-skyndiréttunum og samhliða breytingunum verður hætt við notast við slagorð réttanna – „Matur fyrir sjálfstæða Íslendinga“. Forstjóri segir að sífellt fleiri skilji ekki vísun slagorðsins til ártalsins – það er réttirnir dragi nafn sitt af ártalinu þegar Íslendingar lýstu yfir sjálfstæði frá Danmörku.

Steinþór Skúlason, forstjóri SS, segir að 1944-réttirnir séu eitt sterkasta vörumerkið á markaðnum. „En það er eins og með tískubylgjurnar – maður er ekki alltaf í sömu fötunum. Það er sama með svona línu, það þarf að uppfæra eftir því hvernig straumarnir eru.“

Í sölu frá 1993

Steinþór segir að nú sé verið að breyta umbúðum réttanna í fjórða eða fimmta sinn frá upphafi en 1944-réttirnir hafa verið á markaðnum frá árinu 1993. Þeir höfðu þá verið þróaðir í framhaldi af hinum svokölluðu Rúlluuréttum sem höfðu verið í sölu fáeinum árum áður.

Gamla merkið er til vinstri og það nýja til hægri.SS

„Nú var verið að skipta línunni litalega aðeins í sundur – annars vegar hefðbundna rétti og svo það sem mætti kalla nýmóðins rétti sem höfði kannski meira til yngra fólks. Þetta er til að hjálpa fólki að velja,“ segir Steinþór og bendir á að framvegis upplýsingar um næringargildi réttanna meira sýnilegt og sömuleiðis neytendum gert auðveldara að endurvinna umbúðirnar.

Skilja ekki til hvers sé vísað

Steinþór segir að samhliða breyttu útliti nú þá hafi verið ákveðið að hætta notkun á slagorði réttanna – Matur fyrir sjálfstæða Íslendinga. Í markaðskönnunum fyrirtækisins hafi komið í ljós að sífellt fleiri viti einfaldlega ekki til hvers sé verið að vísa.

„Þetta er náttúrulega orðaleikur. 1944 er árið þar sem Ísland varð sjálfstætt og þannig varð þetta slagorð til á sínum tíma – „Matur fyrir sjálfstæða Íslendinga“. Sem þýðir náttúrulega fyrir alla Íslendinga, við erum öll hluti af sjálfstæðri þjóð,“ segir Steinþór.

Segir eitthvað til um sögukennslu?

Hann segir að slagorðið hafi sömuleiðis verið vísun í nýjan lífstíl. „Fólk er í tómstundum, íþróttum og svo framvegis og borðar ekki allt á sama tíma. Þetta var því vísun í að vera sjálfstæður – maður er ekki bundinn af því að hafa matinn alltaf klukkan sjö. Það var hugmyndin á bak við þetta.

En svo kemur í ljós að æ fleiri voru ekki að skilja hvað þetta slagorð þýddi, að þetta væri vísun í ártalið sem Ísland varð sjálfstætt. Ég veit ekki hvort það segi kannski eitthvað til um sögukennslu nú til dags,“ segir Steinþór.

Auglýsinga- og markaðsmál Sláturfélag Suðurlands Matur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.