Aganefndin dæmdi Erling í bann en sleppti Mörtu

Marta Wawrzynkowska fékk umdeilt rautt spjald þegar ÍBV mætti Val í bikarúrslitaleik kvenna í handknattleik um helgina. Spjaldið fékk hún eftir árekstur við Theu Imani Sturludóttur leikmann Vals en þrátt fyrir að missa Mörtu af velli tryggði ÍBV sér bikarmeistaratitilinn með 31-29 sigri.

Aganefnd HSÍ fundaði í gær og í úrskurði nefndarinnar, sem birtur er á heimasíðu HSÍ, kemur fram að Marta Wawrzynkowska hafi í leiknum hlotið útilokun með skýrslu. Einnig kemur fram að dómarar leiksins hafi metið að brotið falli undir reglu 8:5 b) sem beitt er þegar leikmaður ræðst með „sérstaklega öflugri aðgerð gegn hluta líkama mótherja, sérstaklega andliti, hálsi eða hnakka.“

Niðurstaða nefndarinnar er þó sú að aðhafast ekki frekar vegna málsins. Marta er í leikmannahópi ÍBV gegn KA/Þór en leikur liðanna hófst í Eyjum klukkan 17:30.

Á fundi aganefndarinnar í gær var einnig tekið fyrir mál Erlings Richardssonar, þjálfara karlaliðs ÍBV, sem hlaut útilokun með skýrslu vegna mjög grófrar ódrengilegrar hegðunar eftir leik Harðar og ÍBV á Ísafirði í síðustu viku. 

Niðurstaða nefndarinnar er að Erlingur er dæmdur í eins leiks bann og verður hann því ekki á hliðarlínunni þegar ÍBV mætir Fram í Eyjum á laugardag. Eyjamenn ættu þó ekki að vera í vandræðum með afleysingu því Magnús Stefánsson, aðstoðarþjálfari liðsins, verður aðalþjálfari ÍBV á næstu leiktíð eins og fram kom hér á Vísi á dögunum.

Þá var einnig úrskurðað í málum Skarphéðins Ívars Einarssonar, leikmanns KA, og Þráins Orra Jónssonar, leikmanns Hauka, en báðir hluti þeir útilokun í leikjum sinna liða í síðustu umferð. Aganefndin ákvað þó að hvorugur leikmannanna fengi bann og verða þeir því klárir í slaginn í næstu umferð.