For­stjór­i TikT­ok mæt­ir þing­mönn­um og var­ar við því að bann­a for­rit­ið

Um 150 milljónir Bandaríkjamanna nota forritið reglulega en það nýtur gífurlegra vinsælda um allan heim. Ráðamenn í Bandaríkjunum og víðar hafa áhyggjur af því að ríkisstjórn Kína gæti haft aðgang að persónuupplýsingum notenda en TikTok er í eigu kínverska fyrirtækisins ByteDance Ltd.

Í frétt Washington Post segir að bandarískir ráðamenn hafi aldrei sýnt sannanir fyrir ásökunum sínum og að forsvarsmenn TikTok hafi ávallt neitað þeim. Ótti þeirra sem hafa áhyggjur af persónuupplýsingum notenda TikTok snúa meðal annars að því að BytaDance gæti verið skilyrt til að afhenda yfirvöldum í Kína öll gögn, yrði þeirra krafist.

Áðurnefndir ráðamenn og aðrir hafa einnig áhyggjur af því að forritið vinsæla gæti verið notað til að ýta undir áróður yfirvalda í Kína. Ríkisstjórn Joes Bidens hefur sagt að til greina komi að banna TikTok en það hafði ríkisstjórn Donalds Trumps einnig gert.

Chow, sem er fjörutíu ára gamall og upprunalega frá Singapúr, hefur samkvæmt Washington Post sagt þingmönnum og öðrum í einrúmi að fyrirtæki hans tengist ríkisstjórn Kína.

Í upphafsræðu sinni á þingfundi morgundagsins mun hann meðal annars segja að notendur TikTok muni njóta frelsis gegn öllum ríkisstjórnum. Hann mun segjast að öryggi þeirra 150 milljóna manna sem nota forritið í Bandaríkjunum sé gífurlega mikilvægt.

Fram kemur í frétt Wall Street Journal að forsvarsmenn ByteDance hafa sagt að um sextíu prósent hlutabréfa félagsins séu í eigu alþjóðlegra fjárfesta. Tuttugu prósent séu í eigu starfsmanna og önnur tuttugu í eigum stofnenda. Félagið var stofnað í Peking árið 2012.