Innlent

Snörp orða­skipti á þingi um meint æru­meiðandi um­mæli

Tryggvi Páll Tryggvason skrifar
Helga Vala Helgadóttir og Inga Sæland tókust á á Alþingi í dag.
Helga Vala Helgadóttir og Inga Sæland tókust á á Alþingi í dag. Vísir/Vilhelm

Það kom til snarpra orðaskipti á Alþingi á dag á milli Ingu Sæland, formanns Flokks fólksins, og Helgu Völu Helgadóttur þingmanns Samfylkingarinnar. Inga sakaði samflokksmann Helgu um ærumeiðandi ummæli í sinn garð og kom Helga Vala félaga sínum til varnar.

Inga notaði tækifærið í fundarliðnum um fundarstjórn forseta til að greina frá því að hún hafi sent inn kvörtun til forsætisnefndar þingsins vegna ummæla Þórunnar Sveinbjarnardóttur, þingmanns Samfylkingarinnar, á þingi í síðustu viku.

Taldi Inga að ummæli Þórunnar, sem látin voru falla í umræðu um breytingartillögu Flokks fólksins á útlendingafrumvarpinu svokallaða, hafi verið ærumeiðandi í sinn garð.

„Ég kem hér upp til að bera af mér sakir því þann 15. mars síðastliðinn þá vændi háttvirtur þingmaður, Þórunn Sveinbjarnardóttir, mig um útlendingaandúð,“ sagði Inga.

Sagðist hún hafa ákveðið að leggja umrædd ummæli fyrir forsætisnefnd. Þau hafi verið sérstaklega til þess fallin að kasta rýrð á hana persónulega. Ummælin hafi verið einstaklega særandi fyrir Ingu og fjölskyldu hennar

Umrædd ummæli Þórunnar sem Inga kvartaði yfir

Hæstv. forseti. Þegar ég hélt að þetta frumvarp gæti ekki orðið verra þá kom breytingartillaga frá hv. þingmanni, formanni Flokks fólksins, sem bætir um betur. Það eina sem er hér á ferðinni er ódýr og ógeðfelldur popúlismi sem byggir ekki á staðreyndum, sem byggir á útlendingaandúð. Og það gleður mig að sjá að það er verið að fella þessa tillögu.


Birgir Ármannsson forseti staðfesti á þingfundi að umrætt erindi Ingu til forsætisnefndar hafi borist nefndinni og yrði tekið fyrir á næsta fundi hennar. Bætti hann þó við að líta bæri svo á að það væri hlutverk sitjandi forseta að meta hvort að ummæli sem látin væru falla úr ræðustól færu yfir strikið hverju sinni.

„Oft getur verið mjótt á skilsmununum á milli harkalegrar pólitískrar umræðu og þess sem telja má meiðandi fyrir einstaka þingmenn. Verður í raun og veru mat forseta á staðnum við þær aðstæður að ráða hvað það varðar,“ sagði Birgir.

Inga steig þá aftur í pontu og sagði að ummæli Þórunnar hafi ekki verið beint gegn stjórnmálaflokki, heldur henni persónulega.

Ræða Þórunnar Sveinbjarnardóttur var í eldlínunni á Alþingi í dag.Vísir/Vilhelm

Helga Vala Helgadóttir, þingmaður Samfylkingarinnar, steig þá í pontu og kom samflokksmanni sínum til varnar. Vitnaði hún beint í ræðu Þórunnar og hvatti Ingu til að lesa umrædda ræðu betur.

„Vegna orða háttvirts þingmanns Ingu Sæland, er rétt að vekja athygli hennar á því að háttvirtur þingmaður Þórunn Sveinbjarnardóttir, sagði ekki að háttvirtur þingmaður væri rasisti.“

Hún hafi sagt að breytingartillaga Flokks fólksins bætti um betur.

„Ekki þingmaðurinn,“ sagði Helga Vala.

„Æi, hættu nú alveg,“ skaut Inga þá inn úr sæti hennar.

„Það eina sem væri á ferðinni væri ódýr og ógeðfelldur popúlismi sem byggði ekki á staðreyndum, sem byggði á útlendingaandúð,“ sagði Helga með tilvísun í ræðu Þórunnar.

„Formaður Flokks fólksins, er það ekki ég, háttvirtur þingmaður Helga Vala?“ skaut Inga aftur inn í.

„Ég óska eftir því að háttvirtur þingmaður og formaður Flokks fólksins, lesi ræðu háttvirts þingmanns, Þórunnar Sveinbjarnardóttur, því að þar sér hún að það er ekki verið að vísa til persónunnar Ingu Sæland, heldur tillögunnar sem persónan og þingmaðurinn Inga Sæland var að leggja fram,“ sagði Helga Vala ákveðnum tón og bætti við eftirfarandi á leið úr ræðustól.

„Tillögunnar. Það er alveg skýrt og það er hægt að lesa þetta á heimasíðu Alþingis“

„Ég hvet alla til að gera það,“ skaut Inga inn að lokum.

„Þetta er hérna,“ heyrðist þá Helga Vala segja, sem var þó komin úr mynd í útsendingunni frá Alþingishúsinu.

Horfa má á beina útsendingu frá Alþingi í fréttinni hér að neðan.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×