Sýnir eigin­konunni loksins stuðning á sam­fé­lags­miðlum

Í mörg ár hefur þeim Hailey og Selenu verið stillt upp á móti hvor annarri og Hailey verið sökuð um að hafa stolið Justin af Selenu á sínum tíma. Undanfarnar vikur hafa netheimar logað eftir að Hailey og Kylie Jenner voru taldar hafa gert grín að augabrúnum Selenu Gomez.

Í kjölfarið má segja að notendur TikTok hafi skipst í tvær fylkingar: lið Selenu og lið Hailey og er óhætt að fullyrða að lið Selenu sé talsvert stærra. Aðdáendur Selenu hafa keppst við að grafa upp gamalt myndefni af Hailey með það að markmiði að láta hana líta illa út.

Hailey sögð verða fyrir neteinelti

Nú hefur allt þetta drama hins vegar farið heilan hring og vilja einhverjir nú meina að atburðir síðustu vikna séu ekkert annað en neteinelti í garð Hailey. Þá furða margir sig á því hvers vegna eiginmaður hennar, Justin Bieber, hefur ekki stigið inn og komið eiginkonu sinni til varnar.

Í þeim myndböndum sem hafa birst á TikTok síðustu vikur er meðal annars að finna augnablik þar sem Justin sést koma illa fram til Hailey og ýmsar vísbendingar um það að Justin sé í raun ennþá ástfanginn af Selenu og sé óhamingjusamur í hjónabandinu með Hailey. Eitthvað sem Justin ætti líklega sjálfur að svara fyrir, en ekki Hailey.

Gagnrýndur fyrir að koma eiginkonunni ekki til varnar

Ekki hjálpaði það svo til þegar Hailey birti fallega afmæliskveðju til eiginmannsins á meðan á öllu þessu drama stóð og Justin sýndi engin opinber viðbrögð.

Þrátt fyrir að það séu allar líkur á því að Justin sé búinn að vera að styðja við bakið á eiginkonu sinni allan þennan tíma á bak við luktar dyr, hafa margir velt því fyrir sér hvers vegna hann hafi ekki sýnt henni neinn opinberan stuðning, á meðan netverjar hafa tætt hana í sig.

Ómögulegt að gera netverjum til geðs

Það vakti því mikla athygli þegar Justin birti mynd af þeim hjónum í faðmlögum á Instagram og skrifaði „ég elska þig“. Síðan þá hefur hann svo birt tvær innilegar myndir af þeim úr eftirpartýi Óskarsverðlaunanna. Virðist hann vilja sýna fram á að hjónabandið sé í blóma þrátt fyrir allt.

Aðdáendur virðast þó ekki vera komnir með nóg af þessu drama, því nú finnst þeim Justin vera að deila of miklu og efast þeir jafnvel um að Justin sé í raun að setja þessar myndir inn sjálfur. Það er því nokkuð ljóst að netverjar munu halda áfram að smjatta á þessu drama alveg þar til næsti Hollywood skandall tekur við.