Helga Rún og Erla Soffía til Swapp Agency

Auður Ösp Guðmundsdóttir skrifar 2. mars 2023 09:23

Helga Rún gengur til liðs við Swapp Agency sem gæðastjóri og Erla Soffía hefur verið ráðin sem fjármálafulltrúi. Swapp Agency

Swapp Agency hefur ráðið Helgu Rún Jónsdóttur og Erlu Soffíu Jóhannesdóttur í ört vaxandi teymi fyrirtækisins. Helga Rún gengur til liðs við Swapp Agency sem gæðastjóri en um er að ræða nýja stöðu hjá fyrirtækinu. Erla Soffía hefur verið ráðin sem fjármálafulltrúi.

Í tilkynningu frá Swapp Agency kemur fram að Helga Rún muni stýra gæðamálum Swapp Agency og hafa umsjón með innleiðingu ferla og sjálfvirknivæðingu þeirra. Hún starfaði áður í gæða- og öryggisdeild Festi þar sem hún verkefnastýrði fræðslu, viðburðum, framkvæmdi áhættumat og fleira er tengdist gæða- og öryggismálum hjá Festi og tengdum félögum. Áður gegndi hún stöðu aðstoðarvöruflokkastjóra Krónunnar. Helga Rún er með B.A. gráðu í félagsráðgjöf frá Háskóla Íslands auk þess sem hún stundar MBA nám við sama skóla.

Erla Soffía mun hafa umsjón með daglegum fjármálum Swapp Agency. Hún starfaði áður hjá Ferðaskrifstofu Harðar Erlingssonar og er með B.A. gráðu í þýsku frá Háskóla Íslands auk þess að hafa stundað nám við viðskiptafræðideild sama skóla. Einnig hefur hún sótt námskeið bókara hjá Promennt.

„Við hjá Swapp Agency erum virkilega ánægð með að fá Helgu Rún og Erlu Soffíu í teymið. Við höfum vaxið hratt undanfarin ár og báðar eru þær með fjölbreytta reynslu og verða mikilvægir hlekkir í frekari uppbyggingu fyrirtækisins," segir Davíð Rafn Kristjánsson, annar stofnanda og framkvæmdastjóri Swapp Agency.

Swapp Agency gerir samninga við vinnuveitendur um að borga starfsfólki sem er í fjarvinnu í öðru landi laun. Þá greiðir félagið skatta og launatengd gjöld í því landi sem starfsmaðurinn starfar í. Með þessu verður starfsmaðurinn launþegi á einfaldan hátt í því landi sem hann starfar og nýtur allra réttinda launafólks á vinnumarkaði.

Vistaskipti Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir