Fréttaskýring: Hvað í fjandanum gerðist hjá Brooklyn Nets?

Brooklyn Nets virtist vera með allt í höndunum til að vinna fyrsta NBA-titilinn í sögu félagsins en í stað þessa að fagna sigrum og titlum þá hefur tími ofurliðsins farið í endalaus vandræði og vesen innan sem utan vallar.

Brooklyn Nets tókst vissulega að safna í lið sitt þremur af bestu leikjum NBA-deildarinnar í körfubolta en aðeins tveimur árum síðar stendur félagið aftur á byrjunarreit og með engin afrek frá þessum furðulega tíma.

Spiluðu mjög fáa leiki saman

Súperstjörnurnar Kevin Durant, Kyrie Irving og James Harden voru ekki nálægt því að ná þeim hæðum með liðinu sem langflestir bjuggust við. Það sem meira er þeir spiluðu mjög fáa leiki saman þar sem meiðsli, kórónuveirubólusetningar og leikbönn reyndust oft erfiðari andstæðingur en hin liðin í deildinni.

Durant, Irving og Harden spiluðu aðeins sextán leiki saman og Nets liðið vann þrettán þeirra þar af fimm af sex í úrslitakeppninni. Þetta gefur ástæðu til að halda að við höfum í raun aldrei fengið sönnun á því hvort samvinna þeirra gengi upp eða ekki. Þetta sigurhlutfall er frábært en leikirnir eru hreinlega alltof fáir til að við séum við fullgilda niðurstöðu.

Eftir að Brooklyn Nets sendi Kevin Durant, og síðustu þrjú árin af samningi hans, til Phoenix Suns varð endanlega ljóst að metnaðarfulli litli bróðirinn í New York stendur enn á ný á upphafsreit.

Nokkrum dögum fyrr hafði Brooklyn sent Kyrie Irving til Dallas Mavericks og fyrir ári síðan fór James Harden til Philadelphia 76ers. Allar þessar stórstjörnur höfðu óskað eftir því að vera skipt frá félaginu.

Fyrir komu þríeykisins var Brooklyn Nets rómað fyrir að finna óslípaða demanta og gera úr þeim flotta og vel nothæfa leikmenn. Liðið var mjög ungan og spennandi kjarna þegar öllu var fórnað sumarið 2019 til að næla í eitthvað af stóru stjörnunum. Liðið vantaði stjörnur og til þess að ná í þó var miklu fórnað.

Fallegu sögunni fórnað

Félag sem hafði tímabilið á undan verið eitt af fallegu sögunum úr deildinni eftir að það fór nánast stjörnulaust inn í úrslitakeppnina. Kenny Atkinson var að gera flotta hluti sem þjálfari og inn á vellinum voru ungir guttar eins og D'Angelo Russell, Spencer Dinwiddie og Caris LeVert að skapa sér nafn með því að spila fyrir liðið og fyrir hvern annan.

Gott orðspor liðsins og félagsins hefur aftur á móti farið beint út um gluggann eftir vandræði og vitleysu síðustu ára.

Súperstjörnurnar gengu eftir eigin takti og meiðsli Kevin Durant voru ekki að hjálpa mikið. Hann missti alveg af fyrsta tímabilinu og hefur síðan meiðst ítrekað síðan.

Harden sá fyrsti í fýlu

James Harden var sá fyrsti sem fór í fýlu og vildi í burtu eftir að hafa ekki lengur getað ráðið öllu eins og hjá Houston Rockets og þá eru óupptalin vandræði Kyrie Irving utan vallar. Ef Irving máttu ekki spila af því að hann vildi ekki bólusetja sig þá var hann að vinna sér inn bann fyrir gyðingahatur og almenna þrjósku á samfélagsmiðlum.

Það hjálpaði ekki í Harden skiptunum að það gekk mjög illa að koma manninum, sem félagið fékk í staðinn, hreinlega inn á völlinn. Ben Simmons missti af öllu síðasta tímabili og hefur verið í tómum vandræðum í vetur.

Þrjóska Kyrie þýddi að hann kenndi öllum öðrum um vandræði sín og tók enga ábyrgð sjálfur. Þegar forráðamenn Brooklyn Nets vildu fá einhvern vott af því geta dregið hann til einhverjar ábyrgðar í nýjum samningi þá var Kyrie fljótur að skella hurðum og tala um vanvirðingu félagsins.

Segist fegin að Durant losnaði líka

Frá skiptunum hefur Kyrie verið duglegur að gagnrýna stjórnarhætti hjá Nets og sagðist nú síðast vera feginn að Durant hafi líka losnað úr prísundinni. Eins og vanalega þá var þetta allt öðrum að kenna.

Þríeykinu til varnar þá er þetta ekki í fyrsta sinn sem Brooklyn Nets safnar að sér stjörnum og allt fer til fjandans. Það muna eflaust einhverjir eftir Nets-liðinu þegar menn þar á bæ söfnuðu að sér gömlum hetjum í skiptum við Boston Celtic og fengu til sín Paul Pierce, Kevin Garnett og Jason Terry.

Gömul hetja fékk líka að þjálfa liðið en það var Jason Kidd. Nú var það Steve Nash sem fékk að þjálfar stjörnuprýtt Nets-liðið. Þetta hljómar allt svolítið svipað og gefur tilefni til að vísa gagnrýninni á stjórn félagsins.

Nú hefur stjörnuleit Brooklyn Nets endað með stjörnuhrapi í tvígang á síðasta áratug og enn á ný þurfa menn að byrja upp á nýtt.

Algjörlega nýtt lið á nokkrum dögum

Liðið hefur skipt mönnum hingað og þangað og safnað að sér nýjum leikmönnum og fullt af valréttum. Á nokkrum dögum er hreinlega komið algjörlega nýtt lið hjá Brooklyn Nets. Hvort Brooklyn gefi sér tíma til að byggja upp nýtt lið er hins vegar allt önnur saga. Hingað til hefur liðið freistast af stjörnunum og að búa til meistaralið á augabragði.

Eins og með Los Angeles Clippers þá þrá forráðamenn Brooklyn Nets ekkert heitar en að komast út úr skugga stóra bróður í New York Knicks hinum megin við East River. Bæði félög hafa hins margsannað að þú býrð ekki til meistaralið á einum degi.