Innlent

Segir kyn­lífs­verka­fólk búa yfir við­kvæmum upp­lýsingum um blaða- og al­þingis­menn

Jakob Bjarnar skrifar
Skjáskot úr kynlífsmyndbandinu sem hefur heldur betur valdið titringi innan Slökkviliðsins. Anna Karen Sigurðardóttir hefur upplýst að hún hafi tekið þátt í gerð þess, segist ekki vilja gera lítið úr málinu en hún fordæmir fréttaflutning af því og talar um hræsni innan slökkviliðsins.
Skjáskot úr kynlífsmyndbandinu sem hefur heldur betur valdið titringi innan Slökkviliðsins. Anna Karen Sigurðardóttir hefur upplýst að hún hafi tekið þátt í gerð þess, segist ekki vilja gera lítið úr málinu en hún fordæmir fréttaflutning af því og talar um hræsni innan slökkviliðsins. skjáskot

Anna Karen Sigurðardóttir, húðflúrlistamaður sem tók þátt í gerð kynlífsmyndbands í slökkviliðsbifreið í höfuðstöðvum Slökkviliðsins í Skógarhlíð, myndbands sem hefur dregið dilk á eftir sér, er afar ósátt við það hvernig ýmsir fjölmiðlar hafa fjallað um málið.

Hún tjáir þá skoðun sína á Instagram-síðu sinni sem hún kallar mynaughtylittlesecret2. Þar sakar hún fjölmiðla um óvandaðan fréttaflutning og slökkviliðið um hræsni.

Anna Karen vill meina að DV, Fréttablaðið og fleiri fjölmiðlar hafi birt persónugreinanlegar upplýsingar sem svo leiddu til þess að öllum þeim sem kunna á Internetið megi ljóst vera hverjir það voru sem stóðu að gerð myndbandsins. Og það hafi svo leitt til áreitis í þeirra garð.

Anna Karen gengst við því að hafa tekið þátt í myndbandsgerðinni, og segir það hafa verið mistök. Þá kemur fram að Anna Karen hafi ekki í hyggju að veita fjölmiðlum viðtal vegna málsins, blaðamönnum sem hún sakar um óvönduð vinnubrögð og það að hafa rifið hluti úr samhengi.

Þá kemur fram í máli hennar, sem hún setur fram á hinu svokallaða „story“ á Instagram, sem eru myndbandsbrot þar sem blandað er saman tali og svo skiltum þar sem sjá má textaklausur, að kynlífsverkafólk (sem hún telur reyndar hræðilegt orð) sé samheldinn hópur. 

Anna Karen eins og hún birtist á Instagram. Þar fer hún yfir málið eins og það horfir við sér. Hún þvertekur fyrir að hún hafi sagst ætla að leka upplýsingum, aðeins að hún hafi sagst geta gert það. Og á því tvennu segir hún að sé munur.instagram/skjáskot

Þá lætur Anna Karen að því liggja að blaðamenn ættu að hugsa sig um tvisvar áður en þeir abbist uppá þann hóp. Því hann búi yfir viðkvæmum upplýsingum um blaðamenn, fréttamenn, alþingismenn og fleiri, eins og hún orðar það. Og hætt sé við að yrðu þær upplýsingar gerðar opinberar myndu fleiri missa vinnuna, verða reknir eins og sjúkraflutningsmaðurinn samverkamaður hennar í myndbandsgerðinni. Hún segist aldrei hafa sagt að hún ætlaði sér að birta slíkar upplýsingar, en vekur athygli á því að sá möguleiki sé vissulega til staðar.

Ansi margir sem gætu misst vinnuna

Svo ekkert fari milli mála, að ekkert sé úr samhengi tekið, má hér neðar sjá uppskrifað það sem Anna Karen hefur um málið að segja, í tali og á textamyndum á Instagramreikningi sínum. Vísi tókst ekki að ná tali af Önnu Karen en í máli hennar á Instagram koma fram ýmsar upplýsingar um þetta sérstaka mál sem hefur valdið verulegu uppnámi innan slökkviliðsins.

„Eruð þið viss um að ykkur (og ykkar starfsfólki) langi í sandkassaleik við content creators og/eða sex workers? @DVfrettir, @Hringbraut, @Fréttablaðið, @mblfrettir,“ segir í texta áskilti. Þá tekur Anna Karen til máls og segir:

„Við skulum endilega hafa nokkra hluti á hreinu. Meðal annars að við „sex workers“ erum frekar „tight“ samfélag. Og við erum með töluvert magn af upplýsingum um okkar viðskiptavini sem eru frekar margir. Og í allskonar stöðum og störfum. Þannig að ef þið viljið og ætlið að halda áfram að taka þátt í mannorðsmorðinu sem er að eiga sér stað og á sér stað í kringum þetta allt saman, bæði gagnvart Creators og öðrum, þá skulið þið prísa ykkur sæla að við skulum ekki gera slíkt hið sama. Því það væru ansi margir sem myndu missa vinnuna. Hátt settir einstaklingar í allskonar stöðum og störfum. Blaðamenn, fréttamenn, þingmenn, allskonar. Þannig að, já.“

Klámmyndbandið mistök

Þá taka við skilti í Intagram-story Önnu Karenar þar sem lesa má eftirfarandi:

Frettabladid.is/frettir/varar-fok-vid-ad-fjalla-frekar-um-myndbandid „Æjji, kommon @frettabladid Er þetta fyrirsögn sem þið ætlið að nota? Hversu stór hluti af ykkar starfi felst í því að túlka frásagnir viðmælenda ykkar þannig að fréttirnar komist sem best til skila?“

„Með þessum orðum/storyi er ég ekki að vitna í/svara fyrir myndband sem tekið var upp í sjúkrabíl. Ykkur fjölmiðlum er ekki heimilað að umorða eða birta þessa umræðu öðruvísi en orðrétt og eins og hún kemur fram hér.“

„Mannorðsmorðið sem ég nefndi áðan, vil ég góðfúslega benda á að er ykkar gjörningur – með ómálefnalegum og ófagmannlegum vinnubrögðum. Við getum rætt mistökin sem þetta klámmyndband var síðar. Nú erum við að tala um ykkur.“

„Án þess að gera lítið úr þessu sjúkrabílamáli eða alvarleika þess ætla ég samt sem áður að benda á þá staðreynd að hefði ég setið þá fundi þar sem þetta var rætt hefðu fleiri misst starfið innan slökkviliðsins. #sorrynotsorry“

Hópurinn búi yfir viðkvæmar upplýsingum

Þó Anna Karen láti að því liggja að hópurinn búi yfir viðkvæmum upplýsingum um blaðamenn og fleiri, þá hafnar hún því að um hótun af hennar hálfu sé að ræða.

Anna Karen birtir skjáskot af Facebooksíðu DV, þar sem vakin er athygli á frétt blaðsins, þar sem segir:

„Anna Karen Sigurðardóttir, sem tók þátt í alræmdu myndbandi í slökkviliðsbifreið í Skógarhlíð, hefur sent frá sér hótun til fjölmiðla vegna umfjöllunarinnar. Bendir hún á að kynlífsverkafólk eins og hún hafi viðkvæmar upplýsingar um fólk og margir muni missa vinnuna ef þær verða opinberaðar.“

„Gaman að benda á það líka að það eru ansi margir kollegar ykkar kæru blaðamenn/fréttamenn sem ættu ekki að setja sig á háan hest þegar kemur að því að fjalla um mál sem varða „kynlífsverkafólk“ (sem er hræðilegt orð btw)“

„Og nei, ég er svo sannarlega ekki að fara að leyfa ykkur að taka við mig viðtal elsku blaðamenn. Takk samt.“

„Hótun? Blaðamaður @dvfrettir gerði sér lítið fyrir í dag og skrifaði grein þar sem hún tók saman persónuupplýsingar um báða aðila sem tengjast þessu sjúkrabílamáli. Hún tók saman upplýsingar um fyrri störf, upplýsingar af facebook og instagram profileum beggja aðila og setti saman undir svokallaða fréttafærslu. Það vitanlega varð til þess að internetfær almenningur fékk allt sem þurfti til að byrja að áreita.“

Ætlar sér ekki að gera lítið úr alvarleika málsins

Og áfram birtir Anna Karen textaskilti þar sem má lesa eftifarandi:

„Þess vegnaspyr ég, hvar er línan? Má hún setja svona, leyfislaust og á þennan líka einstaklega taktlausa og ófagmannlega hátt, í „sviðsljósið“? Má ég þá ekki allt eins standa upp og benda á hræsnarana í slökkviliðinu og fleiri stofnunum sem sitja núna, vonandi með verðskuldaðann magaverk og skitusting?“

„Mér dettur ekki í hug að draga úr alvarleika málsins er varðar sjúkrabílinn og vildi óska af öllu hjarta að ég gæti dregið það til baka. Ég tek ábyrgð á eigin gjörðum og þykir þetta leitt. Þettahefði aldrei átt að eiga sér stað og ég vona að slökkviliðið endurhugsi þá ákvörðun sína að segja honum upp. En ég ætla ekki að sitja hérna þegjandi án þess að benda á hræsnina.“

„Ég sagðist aldrei ætla að leka upplýsingum en ég sagðist geta gert það. Ég sagði líka að fjölmiðlum væri ekki heimilt að taka þessi orð úr samhengi en þú veist… áfram þið.“

Fjallað var um afstöðu kynlífsverkafólks hér á landi í Kompás fyrr á árinu.


Tengdar fréttir

Þing­menn kasta á milli sín heitri klám­kar­töflu

Arndís Anna Kristínardóttir Gunnarsdóttir þingmaður Pírata er fyrsti flutningsmaður frumvarps þar sem lagt er til að felld verði út refsiheimild almennra hegningarlaga vegna birtingar kláms á prenti, innflutnings þess í útbreiðsluskyni, sölu og útbýtingar eða annars konar dreifingar þess.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.