Viðskipti erlent

Zuckerberg líka ósáttur við Apple

Samúel Karl Ólason skrifar
Mark Zuckerberg, forstjóri Meta.
Mark Zuckerberg, forstjóri Meta. EPA/MICHAEL REYNOLDS

Mark Zuckerberg, forstjóri META (áður Facebook), segir Apple hafa of mikil völd á sviði smáforrita í síma og snjalltæki. Tók hann þar undir ummæli auðjöfursins Elon Musk, sem lýsti því yfir fyrr í vikunni að hann ætlaði í stríð við Apple, áður en hann dró svo í land með það.

Á ráðstefnu New York Times í gær sagði Zuckerberg að forsvarsmenn Apple hefðu „nokkurn veginn staðsett sig sem eina fyrirtæki sem er að reyna að stjórna því, einhliða, hvaða smáforrit komast á tæki.“ Þetta sagði Zuckerberg ekki vera sjálfbæra eða góða stöðu.

Apple gerir öllum hugbúnaðarfyrirtækjum sem þróa snjallforrit fyrir stýrikerfi Iphone-síma að selja þau í gegnum Appstore-forritaverslunina. Fyrirtækin verða einnig að nota greiðslukerfi þar sem Apple tekur 30% þóknun af öllum greiðslum.

Sjá einnig: Apple slakar á klónni gagnvart minni hugbúnaðarfyrirtækjum

Samkvæmt frétt Wall Street Journal vísaði Zuckerberg í kjölfarið til sýndarveruleikabúnaðar Meta og sagði að þar myndu forritarar njóta meira frelsis varðandi hvaða forrit notendur búnaðarins gætu fengið sér.

„Það er vafasamt þegar eitt fyrirtækið ræður því hvaða forrit eru í boði,“ sagði Zuckerberg um Apple, sem framleiðir iPhone, einhverja vinsælustu snjallsíma heimsins.

Elon Musk, sem var nýverið þvingaður til að kaupa Twitter fyrir 44 milljarða dala, lýsti því yfir fyrr í vikunni að Apple hefði dregið verulega úr auglýsingum sínum á Twitter og velti því fyrir sér á samfélagsmiðlinum sínum hvort Apple hataði málfrelsi. Því seinna hélt hann því fram að Twitter hefði borist hótun frá Apple um að forritið yrði fjarlægt úr forritaverslun fyrirtækisins og að starfsmenn Apple vildu ekki segja af hverju.

Sjá einnig: Musk segist ætla í stríð við Apple

Fljótt kom í ljós að hvorug staðhæfing Musks reyndist rétt.

Apple eyddi meira í auglýsingar á Twitter í nóvember en fyrirtækið gerði í október, samkvæmt gögnum sem blaðamaður tæknimiðilsins Gizmodo greindi.

Þá sagði Musk frá því í gær að Tim Cook, forstjóri Apple, hefði boðið sér í heimsókn til höfuðstöðva fyrirtækisins og þeir hefðu rætt saman. Musk sagði að Cook hefði gert sér ljóst að aldrei hefði staðið til að loka á Twitter í forritaverslun Apple.


Tengdar fréttir

Fyrsta fyrirtæki sögunnar til að vera metið á þrjár billjónir dollara

Bandaríski tæknirisinn Apple varð í gær fyrsta fyrirtæki sögunnar til að vera metið á þrjár billjónir Bandaríkjadala. Hlutabréfaverð í fyrirtækinu hefur hækkað um heil 5.800 prósent síðan Steve Jobs, einn af stofnendum fyrirtækisins kynnti iPhone símann árið 2007.

Segir upp ellefu þúsund manns

Mark Zuckerberg, forstjóri Meta, móðurfélags Facebook, tilkynnti í morgun að um ellefu þúsund starfsmönnum fyrirtækisins yrði sagt upp. Það samsvarar um þrettán prósentum af starfsmönnum Meta en forsvarsmenn fyrirtækisins ætla einnig að grípa til fleiri aðgerða til að hagræða í restri þess.

Hagnaður Meta dróst saman um helming

Virði hlutabréfa Meta, áður Facebook, hefur lækkað töluvert í kjölfar þess að fyrirtækið birti annað ársfjórðungsuppgjörið í röð þar sem tekjur hafa dregist saman. Félagið er nærri því að falla úr flokki tuttugu verðmætustu félaga Bandaríkjanna eftir mjög erfitt rekstrarár.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×