Apple gerir öllum hugbúnaðarfyrirtækjum sem þróa snjallforrit fyrir stýrikerfi Iphone-síma að selja þau í gegnum Appstore-forritaverslunina. Fyrirtækin verða einnig að nota greiðslukerfi þar sem Apple tekur 30% þóknun af öllum greiðslum.

Epic Games, framleiðandi tölvuleiksins vinsæla Fornite, stefndi Apple í kjölfar þess að leiknum var úthýst í Appstore vegna þess að fyrirtækið byggði eigin greiðslukerfi fyrir viðskipti innan leiksins. Krefst Epic Games þess fyrir dómi að notendur Iphone fái að sækja snjallforrit utan Appstore.

Niðurstaða liggur enn ekki fyrir í því máli en nú hefur Apple gert samkomulag til að freista þess að friða hóp smærri hugbúnaðarfyrirtækja sem þróa snjallforrit fyrir Ios-stýrikerfið. 

Með samkomulaginu fá fyrirtækin leyfi til að hvetja viðskiptavini sína til að greiða fyrir þjónustu í forritum fyrir utan Appstore, að sögn New York Times. Það geta þau gert með tölvupósti eða öðrum hætti en fyrirtækjunum verður áfram bannað að beina viðskiptinavinum sínum í önnur greiðslukerfi í forritunum sjálfum.

Auk þess ætlar Apple að stofna sjóð til að greiða litlum hugbúnaðarfyrirtækjum og lofa að hækka ekki þóknun sem það tekur af greiðslum í Appstore hjá minni fyrirtækjum. Þóknunin var lækkuð úr 30% í 15% í að minnsta kosti þrjú ár í fyrra.

Stærri hugbúnaðarfyrirtæki þurfa að greiða hærri þókanir til Apple en þau mótmæla enn viðskiptaháttunum. Tónlistarveitan Spotify og Match Group sem á stefnumótaforritið Tinder styðja Epic Games í málaferlunum við Apple.