Atvinnulíf

Tekur úr uppþvottavélinni og eldar en er meinaður aðgangur að þvottahúsinu

Rakel Sveinsdóttir skrifar
Ólafur Jóhann Ólafsson vaknar við klukkuna í hausnum á sér um klukkan sjö á morgnana en í fyrsta sinn í þrjátíu ár eru hann og eiginkonan nú að vakna ein í húsinu því yngsta barnið er farið í háskóla. Ólafur þykir góður í að raða í skúffur og hillur en telst ekki nógu útsjónarsamur til að raða vel í uppþvottavélina.
Ólafur Jóhann Ólafsson vaknar við klukkuna í hausnum á sér um klukkan sjö á morgnana en í fyrsta sinn í þrjátíu ár eru hann og eiginkonan nú að vakna ein í húsinu því yngsta barnið er farið í háskóla. Ólafur þykir góður í að raða í skúffur og hillur en telst ekki nógu útsjónarsamur til að raða vel í uppþvottavélina. Vísir/Vilhelm

Ólafur Jóhann Ólafsson segir mestan sinn tíma fara í skriftir. Heima fyrir er hann ágætlega duglegur; eldar, er góður í að raða í hillur og skúffur og hita kaffi, en jafn vonlaus í að raða í uppþvottavélina eða þvo þvott. 

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna yfirleitt um sjöleytið við klukku í hausnum á mér.“

Hvað er það fyrsta sem þú gerir á morgnana?

„Í fyrsta sinn í þrjátíu ár vöknum við hjónin nú ein í húsinu því yngsta barnið er farið í háskóla og býr á heimavist.

Ég hafði það fyrir reglu að útbúa morgunmat fyrir heimasætuna en nú eru mín fyrstu verk að taka úr uppþvottavél og hita kaffi. 

Anna kona mín setur í hana því það er vandasamara en að taka úr henni og ég þyki ekki nógu útsjónarsamur til þess. 

En ég kann að raða í hillur og skúffur og kaffið sem ég bý til nýtur vinsælda á heimilinu svo þetta blessast nú allt saman.

Síðan lít ég blöð og fæ mér léttan morgunverð, lít kannski aðeins á tölvupósta og svara þeim sem nauðsyn krefur, sest svo inn á skrifstofu og byrja að vinna.“

Í hvaða heimilisverki ert þú a) mjög góður og duglegur í, b) afar lélegur í og slugsar? 

„Ég hef gaman af að elda og sé um kvöldmatinn á heimilinu þegar tækifæri gefst. Ég hef gert það lengi og þykir hvíld í því. 

Mér er hins vegar meinaður aðgangur að þvottahúsinu þar sem Anna ræður ríkjum. Ég get að vísu ekki haldið því fram að ég hafi gert ítrekaðar tilraunir til að ráðast þar inn.“

Það telst algjör undantekning að birta myndir af fleirum en gesti kaffispjallsins og það er aðeins gert ef tilefnið telst ærið til þess. Eins og núna, því óvænt náðist mynd af þeim félögum Ólafi og Baltasar Kormáki saman í Gufunesi þar sem tökur standa nú yfir á kvikmyndinni Snertingu. Ólafur og Balti skrifuðu saman handritið en það byggir á bók Ólafs sem gefin var út árið 2020.Vísir/Vilhelm

Í hvaða verkefni ertu að vinna helst í þessa dagana?

Ég er nú að fylgja úr hlaði nýrri bók sem heitir Játning og gerist að mestu leyti á Íslandi og í Austur-Þýskalandi þótt Ítalía komi líka við sögu. 

Ég hef líka verið með annan fótinn uppi í Gufunesi þar sem Baltasar Kormákur leikstýrir Snertingu en við skrifuðum saman handrit að myndinni. 

Það hefur verið afar ánægjulegt að fylgjast með tökunum, bæði inni á japanska matsölustaðnum sem búið er að smíða í stúdíóinu og líka í Lundúnum þar sem ég heimsótti þau um daginn.“

Hvernig skipuleggur þú þig í vinnu?

„Ég er mikill rútínumaður, vinn helst alla daga, byrja snemma morguns við skriftir og skrifa fram yfir hádegi en fer þá að sinna öðru, oft einhverju tengdu fjölmiðlabransanum sem ég vann í lengi. Þar á ég enn mjög marga vini og kunningja sem ég reyni að liðsinna eftir megni.

Svo skýst ég í fótbolta eða ræktina eftir hádegi og tek símarúnt eftir þörfum því sum málefni krefjast þess að fólk tali saman í stað þess að senda hvert öðru rafræn skilaboð af einhverju tagi.“

Hvenær ferðu að sofa á kvöldin?

„Ég er yfirleitt farinn að sofa milli tólf og eitt því við borðum kvöldmat yfirleitt nokkuð seint og það er nauðsynlegt að melta matinn áður en maður leggst til hvílu. Mér þykja kvöldin góð en morgnarnir ekki síður svo ég reyni að fara ekki svo seint að sofa ég vakni ekki við hringinguna í kollinum upp úr birtingu.“


Tengdar fréttir

Hlakkar til á kvöldin að drekka kaffið í góðu skapi á morgnana

Morgunhaninn Sigríður Dögg Auðunsdóttir fréttamaður á RÚV og formaður Blaðamannafélags Íslands, viðurkennir að hafa forðast ljósvakamiðla í mörg ár af ótta við að mistakast í beinni útsendingu. Öryggið kom þó á endanum en að fara í sjónvarp var áskorun.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.