Neytendur

Símtöl til Bretlands geta kostað formúu ef menn passa sig ekki

Jakob Bjarnar skrifar
Ef menn eru sér ekki meðvitaðir um breytinguna sem orðið hefur á fyrirkomulagi símtala til og frá Bretlandi og gæta sín gætu þeir hæglega kjaftað sig í gjaldþrot.
Ef menn eru sér ekki meðvitaðir um breytinguna sem orðið hefur á fyrirkomulagi símtala til og frá Bretlandi og gæta sín gætu þeir hæglega kjaftað sig í gjaldþrot. Getty

Brexit hefur þegar haft ýmis áhrif á Bretland og á þá sem eiga í samskiptum við breska heimsveldið. Ef menn passa sig ekki gæti kostað skildinginn að tala í síma á Bretlandseyjum.

Margir sem ferðuðust til Evrópu á árum áður minnast þess með hrolli að hafa fengið ævintýralega háan símreikning ef þeir gáðu ekki að sér og töluðu frjálslega í síma við landa sína heima. Aðild Íslands að EES-samningnum breytti þessu hins vegar og 2017 féllu sérstök reikigjöld niður innan EES-svæðisins. Sem þýddi einfaldlega að Íslendingar gátu hringt innan þess svæðis eins og um innanlandssímtöl væri að ræða.

Brexit, útganga Breta úr Evrópusambandinu, breytir hins vegar ýmsu og nú er staðan sú að símtöl Íslendinga þaðan og þangað geta kostað sitt.

Arnór Fannar Theódórsson vörustjóri hjá Vodafone mætti í Bítið í morgun og útskýrði þetta fyrir þáttastjórnendum sem vöktu máls á að á Bretlandi er fólk nú að upplifa mestu verðhækkanir í manna minnum, eða í ein 42 ár. 

Harður vetur er framundan og þetta á við um símtölin eins og ýmislegt annað. Arnór Fannar sagði að sú breyting, sem kom til framkvæmda 1. október, hafi komið flatt upp á ýmsa viðskiptavini þó Vodafone hafi lagt mikið í að kynna hvað í vændum væri. Fyrirtækið býður upp á ýmsar lausnir en símaglaðir gá ekki að sér eins og með því að kaupa sérstakt daggjald sem nemur 990 krónum þá getur reikningurinn orðið hár. Mínútugjald er 33 krónur og ef menn eru staddir í Bretlandi og símreikningurinn getur því orðið fljótur að bólgna ef menn eru málglaðir.

Þáttastjórnandi Bítisins vildi fá nánari útlistun á fyrirkomulaginu og setti upp dæmi; ef hann hringdi í vin sinn og hefði ekki hugmynd um að sá væri í Bretlandi, það kæmi ekki í ljós fyrr en eftir 20 mínútna símtal, hvort hann væri þá í vondum málum?

Nei, það er ekki svo, að sögn Arnórs. Hins vegar gæti sá sem móttekur símtalið þurft að reiða fram fúlgur. „Hann er ábyrgur fyrir kostnaðinum og getur þá valið um að svara ekki símtalinu. Þú ert hins vegar að hringja eins og þú sért að hringja innan Íslands,“ sagði Arnór Fannar.

Vísir er í eigu Sýnar sem jafnframt á Vodafone.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×