Ræðan sem rauk út á haf!

Þegar fór að styttast í 45. þing ASÍ og ljóst var að ákveðnir aðilar úr hópi forystufólks voru farnir að tilkynna um framboð, sem að mínu mati hefði þýtt fjandsamlega yfirtöku sambandsins, settist ég niður og skrifaði ræðu til að flytja undir liðnum önnur mál í þinglok. Ég er ýmsu vön í félagsstarfi en sú atburðarás sem upphófst á þinginu var með þeim ólíkindum að engum reifarahöfundi hefði dottið í hug að setja þetta saman. Eftir nokkra umhugsun ákvað ég að birta þessa meintu ræðu sem kafla í reifaranum. Ég vona innilega að það komi aldrei til að ræðan verði flutt:

Ástæða þess að ég tek hér til máls undir liðnum önnur mál, er sú að nú hafa þau tíðindi gerst að kosið hefur verið til forystu í ASÍ hópur fólks sem ég hef lítinn áhuga að starfa með. Ég vil því nota þetta tækifæri til að tilkynna að ég mun ekki gefa kost á mér til frekari trúnaðarstarfa fyrir ASÍ. Ég hef upp á síðkastið starfað í Skipulags- og starfsháttanefnd, sem og í laganefnd og biðst hér með undan frekari setu þar. Eins hef ég verið fulltrúi ASÍ í nefnd um endurskoðun á 12. kafla um veikindarétt í kjarasamningum við ríki og sveitarfélög. Einnig hef ég verið fulltrúi sambandsins í Starfsfræðsluráði félags, heilbrigðis- og uppeldisgreina. Ég óska hér með eftir því að vera leyst undan þessum störfum.

Ástæða þess að ég, sem hef viljað af einlægni taka að mér hin fjölbreyttustu störf fyrir verkafólk á þessu landi, treysti mér nú ekki til að vinna í nafni ASÍ, er sú að þetta nýja forystufólk er þannig innstillt að ég tel mig ekki eiga nokkra samleið með þeim eða að ég geti varið eða staðið með skoðunum þeirra.

Ég hef átt langt og gott samstarf með verkalýðshreyfingunni fram til þessa. Ég tel að ég hafi tekið þátt í því að breyta samfélaginu til hins betra t.d. með tilurð fæðingarorlofs fyrir báða foreldra, stofnun fræðslusjóða verkafólks, stofnun fræðslumiðstöðvar atvinnulífsins og stofnun hins opinbera Fræðslusjóðs. Stofnun Virk starfsenduhæfingarsjóðs, stofnun Bjargs íbúðafélags árið 2016 á 100 ára afmæli ASÍ.

Einnig hef ég komið að því að semja um jöfnun mótframlaga í lífeyrissjóði á almennum og opinberum markaði, semja um lengingu á fæðingarorlofi. Semja um bætta réttarstöðu verkafólks á leigumarkaði, hækkun á greiðslum úr ábyrgðasjóði launa o. fl. og fl. upptalningin er alls ekki tæmandi.

Ég var og er líka stuðningsmaður SALEK, sem þetta fólk skilur ekki og hefur gert að einu allsherjar skammaryrði og upplýsir bara um takmarkaðan skilning þeirra á samfélaginu.

Flest af því sem ég hef hér talið upp var unnið í tíð Gylfa Arnbjörnssonar sem forseta ASÍ. Núverandi forysta telur sér það til tekna að hafa hrakið hann úr starfi. Þau studdu fyrir fjórum árum Drífu Snædal í forystuhlutverk ASÍ og afrekuðu það nú síðsumars að hrekja hana úr forystunni, fyrstu konuna á forsetastóli. Ég var ekki stuðningsmaður Drífu þegar hún bauð sig fram en tel að hún hafi vaxiðí starfi með hverju árinu sem leið. Megi þetta ofbeldisfólk hafa skömm fyrir framgang sinn sem leiddi til brotthvarfs hennar.

Góðir fundarmenn

Nýja forystan, telur að lýðræðið felist í því að meirihlutinn kúgi minnihlutann. Skoðanir þeirra særstu séu alltaf réttar og engu máli skipti þær skoðanir, sem koma frá öðrum af því að þeirra félög séu svo lítil, smælingjunum megi bara bjóðast að vera sammála stórveldunum, eigi að klappa fyrir foryngjunum og falla svo fram og tilbiðja þá. Þannig umhverfi er í mínum huga ekki eftirsóknarvert og endar bara illa. Skynsemi á ekkert skylt við stærð aðildarfélaganna.

Ég vil að lokum þakka öllu því frábæra fólki sem ég hef haft tækifæri til að starfa með á liðnum áratugum, bæði einstökum forystumönnum félaga og ekki síður starfsfólki ASÍ.

Ég skora hér með á allt heiðarlegt og velviljað fólk að bíða af sér storminn, sem er í vændum. Verum minnug þess að öll él birtir upp um síðir.

Stormurinn sem kom upp að suðurströndinni þennan mánudagsmorgun 10. október 2022, hringslólaði yfir fundarsölum á Hótel Hilton fram á þriðjudag 11. okt. þá strunsaði stormsveipurinn út, dróg með sér nokkurt fylgdarlið og skildi þingheim eftir í forundran.

Það ætla ég að vona að þetta óveður komi aldrei aftur.

Höfundur er formaður í Stéttarfélagi Vesturlands, sem bæði á aðild að SGS og LÍV og var fulltrúi á 45. þingi ASÍ.