Viðskipti innlent

Brim kaupir aukinn kvóta og nýtt skip

Atli Ísleifsson skrifar
Guðmundur Kristjánsson er eigandi Útgerðarfélags Reykjavíkur og forstjóri Brims.
Guðmundur Kristjánsson er eigandi Útgerðarfélags Reykjavíkur og forstjóri Brims. Vísir/Vilhelm

Brim hf. hefur gengið frá samkomulagi við Útgerðarfélag Reykjavíkur hf. um kaup á félaginu RE 27 ehf. en eignir þess eru frystitogarinn Sólborg RE og veiðiheimildir. Markmið viðskiptanna er sagt vera að efla uppsjávarsvið Brims og styrkja uppsjávarvinnslu félagsins á Vopnafirði.

Í tilkynningu til Kauphallar segir að verðmæti eigna félagsins séu 88,5 milljónir evra, en verðmæti kvóta miðist við markaðsverð í dag og óháðu mati skipasala á Sólborgu RE. ÚR festi kaup á frysti­tog­ar­an­um Sólborgu fyrir um ári, en togarinn hét þá Tasermiut var áður í eigu Arctic Prime Fis­heries á Græn­landi. Togarinn var smíðaður árið 1988, er 76 metra langur og 13,2 metrar á breidd.

Í tilkynningunni segir að skuldir RE 27 ehf. hjá viðskiptabanka nemi 81,5 milljónum evra og muni Brim yfirtaka þær. Kaupverð félagsins sé því sjö milljónir evra sem verði greiddar við frágang viðskipta og eftir að búið sé að uppfylla hefðbundna fyrirvara.

Togarinn Sólborg RE-27 var smíðaður árið 1988, er 76 metra langur og 13,2 metrar á breidd.ÚR

„Keyptar veiðiheimildir á Íslandsmiðum eru 5.84% aflahlutdeild í loðnu, 3.39% í makríl, 11.42% í gulllaxi og 16.86% af þorskveiðikvóta Íslendinga í Barentshafi. Aflaheimildir í loðnu eru ekki komnar til úthlutunar á þessu ári og heimildir til þorskveiða í Barentshafi eru ekki taldar með í heildaraflaheimildum og því eykur viðbótarkvótinn í makríl og gulllaxi aflaheimildir Brims úr 11.56% af heildarþorskígildistonnum í 11.82%. Ekki er komin úthlutun í loðnu fyrir þetta fiskveiðiár og þar af leiðandi er loðnan 0 þorskígildi í dag. Á síðasta ári fóru heildaraflaheimildir Brims í 14.19% við mikla úthlutun á loðnukvóta, þá var ígildisstuðullinn 0,36 í loðnu en er fyrir þetta fiskveiðiár 0,11.

Markmið þessara viðskipta er að efla uppsjávarsvið Brims og styrkja uppsjávarvinnslu félagsins á Vopnafirði. Þá eykur félagið getu sína til veiða á Norðurslóðum. Á undanförnum árum hefur Brim fjárfest í auknum aflaheimildum m.a. með kaupum á félögunum Ögurvík í Reykjavik og Kambi í Hafnarfirði og hafa þau viðskipti bætt afkomu félagsins til muna og aukið arðsemi rekstrarins.

Útgerðarfélag Reykjavíkur er eigandi að 43,97% af hlutafé í Brimi hf. og er eigandi félagsins, Guðmundur Kristjánsson, jafnframt forstjóri Brims,“ segir í tilkynningunni.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×