Enski boltinn

Segist ekki vera að spara sig fyrir HM

Valur Páll Eiríksson skrifar
Van Dijk hefur sætt gagnrýni.
Van Dijk hefur sætt gagnrýni. Matteo Ciambelli/DeFodi Images via Getty Images

Virgil van Dijk, miðvörður Liverpool, hefur sætt gagnrýni fyrir slaka frammistöðu á fyrstu vikum tímabilsins. Hann hefur verið sakaður um að spara krafta sína fyrir komandi heimsmeistaramót í fótbolta, ásakanir sem hann vísar á bug.

Van Dijk hefur verið á meðal betri miðvarða heims frá því að Liverpool greiddi Southampton 75 milljónir punda fyrir Hollendinginn í janúar 2018. Hann hefur átt stóran þátt í velgengni Liverpool frá þeim tíma og hefur unnið alla þá stóru titla sem standa félagsliðum til boða.

Hallað hefur undan fæti í upphafi yfirstandandi leiktíðar þar sem van Dijk, ásamt Liverpool-liðinu öllu, hefur ekki verið upp á sitt besta. Því hefur verið kastað fram að sá hollenski sé að spara sig svo hann komist örugglega á HM í Katar í vetur en hann hefur aldrei tekið þátt á stórmóti.

Van Dijk missti af EM sem fór fram í fyrra vegna krossbandameiðsla en hann segir það fjarri sannleikanum að hann stígi varlega til jarðar þessa dagana til að forðast meiðsli í aðdraganda HM.

Alls ekki, alls ekki, sagði miðvörðurinn. Ég get fullvissað þig um að það er klárlega ekki staðan. Við erum ekki í þessari stöðu vegna þess, sagði van Dijk við blaðamann sem spurði út í sögusagnirnar.

Holland er í A-riðli HM í vetur ásamt Ekvador, Senegal og gestgjöfum Katara.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.