Handbolti

Aron og félagar enn með fullt hús stiga | Jafntefli hjá Ísendingaliði Ribe-Esbjerg

Hjörtur Leó Guðjónsson skrifar
Aron Pálmarsson og félagar hans í Álaborg unnu góðan sigur í dag.
Aron Pálmarsson og félagar hans í Álaborg unnu góðan sigur í dag. Frank Molter/picture alliance via Getty Images

Aron Pálmarsson og félagar hans í Álaborg eru enn með fullt hús stiga í dönsku úrvalsdeildinni í handbolta eftir sex marka útisigur gegn Skjern í dag, 28-34.

Aron og félagar byrjuðu af miklum krafti og skoruðu fyrstu þrjú mörk leiksins. Þeir náðu mest fjögurra marka forskoti í fyrri hálfleik og staðan þegar gengið var til búningsherbergja var 16-19, Álaborg í vil.

Gestirnir frá Álaborg náðu fljótt sex marka forskoti í síðari hálfleik og létu forystuna aldrei af hendi. Liðið vann að lokum sex marka sigur, 34-28, en Aron skoraði tvö mörk fyrir Álaborgarliðið.

Álaborg er því enn með fullt hús stiga eftir fjóra leiki og trónir á toppnum í dönsku úrvalsdeildinni. Skjern situr hins vegar í fimmta sæti deildarinnar með fimm stig.

Þá gerði Íslendingalið Ribe-Esbjerg 33-33 jafntefli er liðið heimsótti Skanderborg í sömu deild skömmu síðar. Ágúst Elí Björgvinsson stóð vaktina í marki Ribe-Esbjerg og varði tíu skot. Elvar Ásgeirsson skoraði eitt mark fyrir liðið, en Arnar Birkir Hálfdánarson komst ekki á blað.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.