Formúla 1

Baunar á forsetann vegna ummæla um konur í Formúlu 1

Sindri Sverrisson skrifar
Sebastian Vettel segir ekkert því til fyrirstöðu að konur keppi í Formúlu 1.
Sebastian Vettel segir ekkert því til fyrirstöðu að konur keppi í Formúlu 1. Getty

Fjórfaldi heimsmeistarinn Sebastian Vettel harmar ummæli forseta Formúlu 1, Stefano Domenicali, um að konur væru langt frá því að komast inn í keppnina og segir hann hafa sent út kolröng skilaboð.

Domenicali lét hafa eftir sér í gær að það þyrfti eitthvað á borð við það að lofsteinn lenti á plánetunni Jörð til að það myndi kona keppa í Formúlu 1 á næstu fimm árum. Engin kona hefur keppt í Formúlu 1 síðan á áttunda áratug síðustu aldar.

„Þetta var mjög óheppilegt orðaval,“ sagði Vettel. „Ég sé enga ástæðu fyrir því að við getum ekki átt konu á brautinni.“

Domenicali útilokaði alls ekki að konur gætu keppt í Formúlu 1 í framtíðinni og hélt því fram að unnið væri að því að finna leiðir til að greiða leið þeirra þangað. Von væri á aðgerðum, sem hann vildi þó ekki greina frá nánar.

Vettel segir að ummæli forsetans hafi hins vegar einfaldlega sent út röng skilaboð.

„Það eru svona umæli sem ég býst við að konur og stelpur þurfi að eiga við þegar þær eru að vaxa úr grasi og deila með öðrum draumum sínum, sitjandi við morgunverðarborðið að segja að þær vilji verða ökuþórar,“ sagði Vettel.

„Og pabbinn gæti hafa lesið eitthvað nákvæmlega svona og sagt: „Þér finnst aðrir hlutir líka skemmtilegir, af hverju ekki að einbeita sér að þeim?“ Þær einbeita sér þá kannski að öðru og hætta að hugsa um kappakstur. Það er mikilvægt að við segjum ekki eitthvað svona því það eru alls staðar neistar,“ sagði Vettel og skoraði á stelpur að sýna að Domenicali hefði rangt fyrir sér.

„Þessi steríótýpu-hugsunarháttur er smám saman að hverfa en hann verður að hverfa alveg,“ sagði Vettel.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.