Viðskipti innlent

Spá 0,75 prósenta hækkun stýri­vaxta

Bjarki Sigurðsson skrifar
Jón Bjarki Bentsson, aðalhagfræðingur Íslandsbanka.
Jón Bjarki Bentsson, aðalhagfræðingur Íslandsbanka. Vísir/Egill

Greiningardeild Íslandsbanka spáir því að stýrivextir hækki um 0,75 þann 24. ágúst næstkomandi þegar peningastefnunefnd Seðlabankans fundar. Stýrivextir fara þá í 5,5 prósent en vextirnir hafa ekki verið hærri síðan árið 2016.

Vextirnir voru síðast hækkaðir í júní og þá um eitt prósent. Mánuðinn þar á undan voru þeir einnig hækkaðir um eitt prósent og í febrúar á þessu ári hækkuðu þeir um 0,75 prósent. Greiningardeildin spáir því einnig að vextirnir muni hækka einu sinni enn á þessu ári eftir fundinn í næstu viku, og þá um 0,5 prósent. Því muni þeir standa í sex prósentum undir lok árs.

„Vaxandi verðbólga, hækkandi verðbólguvæntingar og þenslumerki í hagkerfinu munu líklega ráða mestu um ákvörðun nefndarinnar. Stýrivextir verða líklega að minnsta kosti 6% í árslok en hægfara vaxtalækkunarferli gæti hafist eftir mitt næsta ár,“ segir í spá bankans sem birtist í dag.

Í spánni segir að kaupmáttur launa hafi rýrnað frá áramótum og almenningur sé svartsýnni á horfu í efnahag og atvinnulífi en hann hefur verið frá miðju ári 2020. Þetta, ásamt öðru, er samkvæmt deildinni, líklegt til að slá umtalsvert á neyslugleði landsmanna á seinni helmingi árs.

Hækkandi íbúðaverð skýrir talsverðan hluta verðbólgunnar samkvæmt spánni. Þegar mismunandi mælikvarðar á verðbólgu eru skoðaðir sé þó hægt að sjá að verðbólguþrýstingurinn er útbreiddur.

„Til að mynda mældist verðbólga miðað við VNV án húsnæðis 7,5% í júlímánuði. Auk íbúðaverðsins hefur innflutt verðbólga aukist verulega og innlendur kostnaðarþrýstingur í framleiðslu, verslun og þjónustu er umtalsverður um þessar mundir,“ segir í spánni.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.