Viðskipti innlent

Helga Björg, Ingi­gerður og Páll Vignir í nýjum hlutverkum hjá Sýn

Hallgerður Kolbrún E. Jónsdóttir skrifar
Ingigerður og Helga Björg eru komin í ný hlutverk hjá Sýn.
Ingigerður og Helga Björg eru komin í ný hlutverk hjá Sýn. Vísir

Helga Björg Antonsdóttir, Páll Vignir Jónsson og Ingigerður Guðmundsdóttir hafa ýmist verið ráðin til starfa hjá Sýn eða taka við nýjum störfum hjá fyrirtækinu. Helga Björg hefur verið ráðin markaðsstjóri Vodafone, Ingigerður sem nýr öryggis- og gæðastjóri og Páll Vignir nýr forstöðumaður fjölmiðlalausna. 

Þetta kemur fram í tilkynningu frá Sýn. Ingigerður hóf störf hjá fyrirtækinu í byrjun mánaðar en áður starfaði hún sem öryggis- og gæðastjóri meðal annars hjá Lyfjastofnun, Borgun og Sjóvá og býr yfir áratuga reynslu af öryggis- og gæðamálum. 

Fram kemur í tilkynningu að starf hennar muni meðal annars felast í að bera ábyrgð á rekstri og þróun á gæðakerfi Sýnar, viðhalda alþjóðlegu öryggisvottuninni ISO27002 og jafnlaunavottun IST85. Þá muni hún hafa umsjón með innri og ytri úttektum, innkaupum á öryggisbúnaði, umsjón með áhættugreiningu og greiningu á ferlum. Þá muni hún sinna fræðslu og ráðgjöf starfsmanna um öryggis- og gæðamál og hafa eftirlit og samskipti við opinbera aðila varðandi þau mál.

Páll Vignir nýr forstöðumaður fjölmiðlalausna.Vísir

Páll Vignir hefur verið ráðinn forstöðumaður fjölmiðlalausna sem er nýtt svið innan Sýnar. Í tilkynningunni segir að Páll Vignir hafi meira en fimmtán ára reynslu á sviði fjölmiðla og hafi unnið að stafrænum breytingum og leitt verkefnahópa í uppbyggingu fjölmiðlalausna. Hann hefur undanfarin átta ár starfað í Bretlandi, síðast hjá Sky Group, en þar á undan hjá Ericsson, Red Bee og BBC en fyrir það hjá Senu og Skjánum á Íslandi. 

Þá hefur Helga Björg verið ráðin markaðsstjóri Vodafone og mun hún leiða hóp sérfræðinga í markaðsdeild Vodafone fyrir einstaklings- og fyrirtækjamarkað. Helga hefur starfað hjá Sýn frá árinu 2020 sem vörumerkjastjóri en starfaði þar áður hjá Ölgerðinni. Helga er viðskiptafræðingur að mennt og hefur lokið MS námi við Háskóla Íslands í markaðsfræði og alþjóðaviðskiptum. 

Vísir er í eigu Sýnar hf.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.