Innherji

Hilmar Þór íhugar alvarlega að bjóða sig fram til stjórnar Sýnar

Þorsteinn Friðrik Halldórsson skrifar
Miklar breytingar hafa verið á hluthafahópi Sýnar að undanförnu. 
Miklar breytingar hafa verið á hluthafahópi Sýnar að undanförnu.  Vísir/Vilhelm

Hilmar Þór Kristinsson, annar eigandi eignarhaldsfélagsins Fasta sem keypti á dögunum stóran hlut í Sýn, íhugar alvarlega að bjóða sig fram til stjórnar fjarskipta- og fjölmiðlunarfyrirtækisins. Þetta staðfestir Hilmar Þór í samtali við Innherja.

„Við erum ekki hljóðlátur fjárfestir. Við erum með umtalsverðan hlut og maður vill leggja sitt á vogarskálarnar,“ segir Hilmar Þór.

Fasti, sem er í eigu Hilmars Þórs og eiginkonu hans Rannveigar Eirar Einarsdóttur, keypti 7,7 prósent hlut í Sýn í gær. Þau eru jafnframt eigendur fjárfestingafélagsins Reirs sem er fimmti stærsti hluthafi Ölgerðarinnar og á Rannveig Eir sæti í stjórn drykkjarvöruframleiðandans. 

„Við höfum alltaf fylgt fjárfestingum okkar eftir með því að fara í stjórnir félaganna. Ef við ætlum ekki að bregða út af þeirri venju þá hef ég í hyggju að fara í stjórn. Mér finnst það ekki ósennilegt,“ segir Hilmar Þór.

Viðskiptin koma í kjölfarið á kaupum Gavia invest, nýstofnaðs fjárfestingafélags, á samanlagt um 16 prósenta hlut í Sýn, meðal annars á öllum hlut Heiðars Guðjónssonar, fráfarandi forstjóra félagsins. Hefur stjórn Sýnar boðið til hluthafafundar þann 31. ágúst að kröfu fjárfestingafélagsins.

Jón Skaftason, sem er í forsvari fyrir Gavia Invest og var um árabil framkvæmdastjóri fjárfestinga hjá 365 miðlum, sagði í samtali við Innherja í síðustu viku að fjárfestahópurinn hefði „fylgst lengi“ með Sýn. „Við ætlum okkur að hafa virka aðkomu að rekstri félagsins og munum beita okkur fyrir aukinni verðmætasköpun í þágu allra hluthafa Sýnar.“

Auk Jóns, sem fer með hlut í Gavia Invest í gegnum félagið sitt Pordoi, þá samanstendur fjárfestahópurinn af Reyni Grétarssyni, stofnanda Creditinfo, og Hákoni Stefánssyni, og auk þess félaginu E&S 101 sem er í eigu Jonathan Rubini, einn ríkasti maður Alaska og meðal stærstu eigenda Keahótela, Mark Kroloff hjá First Alaskan Capital Partners og Andra Gunnarssonar, lögmanns og fjárfestis.

Ég sat í stjórn Sýnar, þekki félagið vel og tel mig hafa séð hversu mikið það á inni

Reynir sagði í samtali við Viðskiptablaðið í vikunni að hann undraðist hvers vegna félagið væri ekki metið hærra og vísaði meðal annars til innviðaeigna. Þá sagði Reynir að hann sjálfur væri tilbúinn að taka sæti í stjórninni ef áhugi væri fyrir því meðal hluthafa, auk þess sem Gavia stefndi að því að fá Jón Skaftason kjörinn í stjórn.

Hilmar Þór deilir þeirri skoðun með Reyni að Sýn sé undirverðlagt á markaði.

„Ég skil ekki af hverju gengi félagsins er ekki hærra en raun ber vitni. Ég sat í stjórn Sýnar, þekki félagið vel og tel mig hafa séð hversu mikið það á inni,“ segir Hilmar Þór sem sat í stjórn Sýnar í eitt ár, frá mars 2020 til mars 2021.

Hlutabréfaverð Sýnar stendur nú 68 krónum á hlut og er markaðsvirði félagsins því um 18,2 milljarðar króna. Gengi bréfa félagsins hefur hækkað lítillega frá áramótum en á síðustu tólf mánuðum hafa þau hækkað í verði um liðlega 63 prósent.

Innherji er undir hatti Sýnar hf.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.