Viðskipti erlent

Kaup Musks á Twitter sögð „í hættu“

Samúel Karl Ólason skrifar
Elon Musk og hans fólk segir ekki hægt að meta raunverulegt verðmæti Twitter án frekari upplýsinga um falska reikninga og botta.
Elon Musk og hans fólk segir ekki hægt að meta raunverulegt verðmæti Twitter án frekari upplýsinga um falska reikninga og botta. EPA/ALEXANDER BECHER

Kaup auðjöfursins Elons Musk á samfélagsmiðlinum Twitter eru sögð í hættu. Musk heldur því fram að ekki sé hægt að sannreyna tölur Twitter um fjölda falskra reikninga og svokallaðra botta á samfélagsmiðlinum og er auðjöfurinn sagður vera hættur viðræðum um fjármögnun kaupanna.

Forsvarsmenn Twitter hafa lengi sagt að fjöldi þessara reikninga samsvari um fimm prósentum af um 230 milljónum daglegum notendum samfélagsmiðilsins. Musk hefur dregið það í efa og sakað Twitter um að veita sér ekki nægjanlega góðar upplýsingar.

Auðjöfurinn lýsti því yfir í maí að kaupin væru í bið, vegna skorts á upplýsingum um botta og falska reikninga. Flestir slíkir reikningar ganga út á að kynna rafmyntir eða klám og forstjóri Twitter sagði fyrr á árinu að um fimm hundruð þúsund slíkum væri eytt á degi hverjum.

Sjá einnig: Musk segir Twitter-kaupin í bið

Musk og hans fólk segir ekki hægt að meta raunverulegt verðmæti Twitter án þessara upplýsinga. Í frétt Washington Post er gefið í skyn að Musk gæti reynt að hætta við kaupin. Einn heimildarmaður WP úr búðum Musks segir forsvarsmenn Twitter ekki hafa verið samstarfsfúsa.

Musk hefur þó þegar skrifað undir kaupsamning um að kaupa fyrirtækið á 44 milljarða dala. Í samningunum er ákvæði um að hann geti ekki hætt við nema eitthvað mikið komi upp og samkvæmt sérfræðingum sem WP ræddi við þykir ólíklegt að skortur á upplýsingum um botta dugi þar til.

Forsvarsmenn Twitter hafa sagt að þeir vilji að gengið verði frá kaupunum, þrátt fyrir að þeir hafi barist gegn Musk til að byrja með. Jafnvel þó Musk takist að sannfæra dómara um fella kaupsamninginn niður gæti hann þurft að greiða Twitter einn milljarð dala.

Allt frá því hann gerði upprunalegt kauptilboð sitt í Twitter hafa verið uppi efasemdir um að Musk hafi raunverulega ætlað sér að kaupa samfélagsmiðilinn. Stærstur hluti auðæfa hans er bundinn í hlutabréfum og hafa lækkanir á mörkuðum komið niður á sjóðum hans. Þá hefur virði Twitter einnig lækkað og hefur það að hluta til verið rakið til ummæla Musks.


Tengdar fréttir

Dóttir Musk vill rjúfa öll tengsl við hann

Átján ára gömul transdóttir auðkýfingsins Elons Musk hefur óskað eftir að láta breyta nafni sínu, ekki aðeins til að endurspegla kynvitund sína heldur einnig til að slíta öll tengsl við föður sinn.

Fá grænt ljós á frekari geimskot frá Texas

Verkfræðingar og vísindamenn SpaceX mega halda áfram tilraunum sínum með geimfarið Starship í Suður-Flórída. Tilraunirnar voru stöðvaðar á meðan umhverfismat fór fram. Framkvæmd matsins dróst verulega á langinn.

Musk hafnar á­sökunum og vill koma á fót mál­sóknar­teymi

Ríkasti maður heims, Elon Musk, hafnar þeim ásökunum sem á hann eru bornar um kynferðislega áreitni. Greint var frá því á dögunum að flugfreyja sem starfaði fyrir fyrirtæki hans sakaði hann um að hafa berað sig við konuna, káfað á henni og boðið henni greiðslu fyrir kynlíf.

Ætla að láta Musk standa við gerðan samning

Stjórn samfélagsmiðilsins Twitter segist ætla að láta Elon Musk standa við gerðan samning um kaup hans á miðlinum fyrir 44 milljarða dollara. Musk reynir nú að nota hlutfall gervireikninga á Twitter til að gera breytingar á samningnum eða komast undan honum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.