Neytendur

Kvörtunum í tengslum við flug­ferðir rignir inn

Vésteinn Örn Pétursson skrifar
Breki Karlsson, formaður Neytendasamtakanna.
Breki Karlsson, formaður Neytendasamtakanna. Vísir/Vilhelm

Kvörtunum vegna seinkana og niðurfellinga á flugferðum hefur stórfjölgað að sögn formanns Neytendasamtakanna en mikil mannekla er á flugvöllum víða um heim. Hann telur flugfélög þurfa að standa sig betur í að upplýsa farþega um réttindi sín.

Fréttir af biðröðum og seinkunum á flugvöllum víða um heim hafa verið daglegt brauð síðustu daga. Íslendingar hafa ekki farið varhluta af þeim áhrifum sem blanda aukinna ferðalaga milli landa og mannekla á flugvöllum víðsvegar hefur haft. 

Breki Karlsson, formaður Neytendasamtakanna, segir kvörtunum vegna seinkana hafa fjölgað. Slíkar kvartanir séu árstíðabundndar, og tíðari snemmsumars.

„En núna er það mun meira heldur en hefur verið í þónokkur ár að undanförnu,“ segir Breki. 

Breki segir að Neytendasamtökin reyni eftir bestu getu að upplýsa farþegar um rétt sinn til skaðabóta og endurgreiðslu á útlögðum kostnaði vegna seinkana og niðurfellinga flugferða. Það sé þó í verkahring flugfélaganna, sem standi sig ekki nógu vel.

„Það er að segja, þau eru skyldug til að veita allar upplýsingar um réttindi flugfarþega þegar kemur að seinkunum eða niðurfellingu. Sum flugfélög hafa því miður vanrækt þessar skyldur. Við höfum aðstoðað fólk við að leita réttar síns í þessu.

Breki bendir sérstaklega á að réttindi farþega til endurgreiðslu eigi einnig við þegar innanlandsflugi er aflýst eða frestað, og segir færri meðvitaða um það en þegar millilandaflug er undir. 

Hver ber ábyrgð?

Breki segir samtökin líta alvarlegum augum að flugfélög vanræki skyldur sínar gagnvart farþegum.

„Samgöngustofa, sem hefur yfirumsjón með þessu, hlýtur að horfa á þetta alvarlegum augum líka og grípa þarna inn í.“

Þá sé það nýtt álitamál hver beri ábyrgð á því þegar farþegar missa af flugi sínu vegna mikilla tafa á flugvöllum, sem stafi af manneklu.

Á borði samtakanna séu slík mál, þar sem farþegar hafi misst af ferðum sínum þrátt fyrir að hafa mætt á flugvöllinn allt að fimm tímum fyrir áætlaða brottför, vegna langra biðraða í öryggisleit og innritun.

„Þarna er spurning um hver ber ábyrgð á því ef farþegi augljóslega kemur á réttum tíma og með góðum fyrirvara á flugvöllinn, en missir samt sem áður af fluginu,“ segir Breki. Hann segir þó líklegt að flugfélög séu þau sem beri ábyrgð gagnvart farþegum sínum, en ekki rekstraraðilar flugvallanna. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×