Fótbolti

Stelpurnar okkar bjóða alla velkomna á æfingu í dag

Sindri Sverrisson skrifar
Íslenska landsliðið heldur af landi brott á mánudaginn. Fyrsti leikur á EM er 10. júlí.
Íslenska landsliðið heldur af landi brott á mánudaginn. Fyrsti leikur á EM er 10. júlí. Getty/Omar Vega

Þeir Íslendingar sem vilja hitta Sveindísi, Söru Björk, Glódísi og aðra leikmenn íslenska landsliðsins í fótbolta geta mætt á opna æfingu í dag, í aðdraganda þess að hópurinn heldur af landi brott vegna Evrópumótsins í Englandi.

KSÍ býður til opinnar æfingar á Laugardalsvelli klukkan 11 og hvetur stuðningsmenn til að mæta. Það hafa leikmenn íslenska liðsins einnig verið duglegir að gera á samfélagsmiðlum. Opnað verður fyrir gesti klukkan 10:30 en viðburðurinn stendur yfir til 12:30.

Stuðningsmenn munu þó ekki geta fengið nýju EM-treyjuna frá Puma áritaða því samkvæmt Twitter-síðu KSÍ er treyjan ekki væntanleg til landsins fyrr en í næstu viku.

Íslenska landsliðið heldur svo af landi brott á mánudaginn og fer þá til Póllands þar sem liðið mætir heimakonum í vináttulandsleik 29. júní. 

Frá Póllandi fer íslenski hópurinn áfram til Þýskalands og æfir í nágrenni höfuðstöðva Puma sem eru í Herzogenaurach. Förinni er svo heitið til Englands 6. júlí, sama dag og upphafsleikur EM fer fram á Old Trafford, á milli Englands og Austurríkis. Fyrsti leikur Íslands er svo gegn Belgíu 10. júlí á akademíuleikvangi Manchester City.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.