Sonja tekur við sölu- og markaðssviði Play

Atli Ísleifsson skrifar 24. júní 2022 10:01

Sonja Arnórsdóttir hefur verið ráðin framkvæmdastjóri sölu- og markaðssviðs flugfélagsins Play. Sonja tekur við sem framkvæmdastjóri sviðsins af Georgi Haraldssyni sem verður framkvæmdastjóri upplýsingatæknisviðs.

Frá þessu segir í tilkynningu frá Play. Þar segir að Sonja sé með BS-gráðu í fjármálaverkfræði og hafi starfað við tekjustýringu hjá flugfélögum síðastliðin tíu ár.

„Hún starfaði sem sérfræðingur í tekjustýringu hjá WOW air þar sem hún leiddi tíu manna teymi og þá hefur hún starfað sem forstöðumaður tekjustýringar- og sölu hjá PLAY frá 2019. Sonja mun nú bera ábyrgð á öllum sölu- og markaðsmálum hjá PLAY,“ segir í tilkynningunni.

Georg verður yfir upplýsingatæknisviði

Ennfremur segir í tilkynningunni að Georg verði nú framkvæmdastjóri upplýsingatæknisviðs PLAY en áður hann hafi áður verið framkvæmdastjóri sölu- og markaðssviðs, auk upplýsingatæknisviðs.

„Vegna aukinna umsvifa Play mun félagið setja enn meiri áherslu á upplýsingatækni og stafræna þjónustu. Leitast verður við að hámarka sjálfvirknivæðingu, sjálfsafgreiðslu og ánægju viðskiptavina að þessu leyti. Georg mun leiða þá þróun áfram fyrir félagið en nú með meiri fókus en áður. Georg hefur starfað um árabil í störfum tengdum upplýsingatækni og stafrænni þróun, meðal annars hjá Völku, Iceland Express, Dohop og Póstinum. Georg er tölvunarfræðingur frá Háskólanum í Reykjavík og er einnig með meistaragráðu í alþjóðaviðskiptum frá sama skóla og IE Business School.“

Play Fréttir af flugi Vistaskipti

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.