Þrír handteknir fyrir ógnandi framkomu og hótanir

Bjarki Sigurðsson og Gunnar Reynir Valþórsson skrifa 13. júní 2022 06:47

Lögreglan hafði í ýmis horn að líta. Vísir/Vilhelm

Þrír menn voru handteknir af lögreglu í nótt á þremur ólíkum stöðum og vistaðir í fangageymslu fyrir ógnandi framkomu og hótanir. Fyrst var tilkynnt um mann í annarlegu ástandi í Hafnarfirði sem var mjög æstur og hafði verið að ógna fólki. Lögregla handtók hann og setti í fangaklefa sökum ástands.

Um hálfþrjú var annar maður í annarlegu ástandi handtekinn, að þessu sinni í Breiðholti. Sá var staddur inni í stigagangi húss þar sem hann var óvelkominn og þegar lögregla kom á vettvang neitaði hann að fara að fyrirmælum hennar og var því handtekið einnig og fékk að gista í fangageymslu.

Þriðja atvikið átti sér síðan stað í Mosfellsbæ en þar var maður handtekinn grunaður um hótanir, brot á reglugerð um skotelda og líkamsárás. Sá fékk einnig að gista á Hverfisgötunni.

Þá var tilkynnt um innbrot í verslun í miðbæ Reykjavíkur en þegar lögregla kom á staðinn hafði hurð verslunarinnar verið spennt upp og sjóðsvélinni verið stolið.

Bifreið var stöðvuð á Suðurlandsvegi við Bláfjöll og ökumaður látinn blása í áfengismæli. Hann reyndist hafa drukkið áfengi en mældist undir refsimörkum. Honum var gert að hætta akstri en hann var einnig með einn umfram farþega í bílnum.

Ökumaður sem ók á Vesturlandsvegi við Suðurlandsveg mældist á 143 kílómetra hraða þar sem hámarkshraðinn er áttatíu kílómetra hraði. Lögregla stöðvaði aksturinn en ökumaðurinn neitaði fyrir brotið.

Lögreglumál Reykjavík Hafnarfjörður Mosfellsbær

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir