Innherji

Stokkað upp í stjórn stærsta fjár­festinga­fé­lags landsins

Hörður Ægisson skrifar
Kristín Pétursdóttir kemur ný inn stjórn Eyris Invest. Hún hefur lengst af starfað í fjármálageiranum en hefur undanfarið verið sjálfstætt starfandi stjórnendaþjálfari og eigandi fyrirtækisins The Inner and Outer Game.
Kristín Pétursdóttir kemur ný inn stjórn Eyris Invest. Hún hefur lengst af starfað í fjármálageiranum en hefur undanfarið verið sjálfstætt starfandi stjórnendaþjálfari og eigandi fyrirtækisins The Inner and Outer Game.

Á aðalfundi Eyris Invest fyrr í þessum mánuði var Kristín Pétursdóttir, sem hefur lengst af starfað í fjármálageiranum og var um tíma stjórnarformaður Kviku banka, kjörin ný inn í stjórn fjárfestingafélagsins.

Jón Helgi Guðmundsson, aðaleigandi Norvik sem á meðal annars Byko, og Ingólfur Guðmundsson, forstjóri Carbon Recycling, gáfu hins vegar ekki kost á sér til endurkjörs en þeir hafa setið í stjórn Eyris um árabil.

Kristín, sem hefur verið sjálfstætt starfandi stjórnendaþjálfari og eigandi fyrirtækisins The Inner and Outer Game, var annar stofnenda fjármálafyrirtækisins Auðar Capital og þá var hún einnig meðal annars forstjóri Mentor á árunum 2015 til 2017.

Við þær breytingar sem hafa verið gerðar á stjórn Eyris Invest, sem er stærsta fjárfestingafélag landsins með yfir 130 milljarða króna í eigið fé um síðustu áramót í krafti fjórðungs eignarhlutar í Marel, hefur stjórnarmönnum félagsins fækkað úr sex í fimm talsins.

Þórður Magnússon, sem á samanlagt nærri 40 prósenta hlut í Eyri ásamt syni sínum Árna Oddi Þórðarsyni, forstjóra Marels, er eftir sem áður stjórnarformaður félagsins. Aðrir stjórnarmenn eru Hrund Gunnsteinsdóttir, framkvæmdastjóri Festa, Stefán Árni Auðólfsson lögmaður og Ólafur Steinn Guðmundsson fjárfestir. Bæði Hrund og Stefán Árni komu ný inn í stjórn Eyris á árinu 2021.

Á aðalfundi Eyris, sem fór fram 4. maí síðastliðinn, var tilkynnt um að stjórn félagsins hefði samþykkt að kaupa eigin bréf fyrir allt að 700 milljónir króna. Niðurstaðan var sú að félagið keypti samtals tæplega 7,4 milljónir bréfa að nafnvirði á genginu 94,9 krónur á hvern hlut.

Á síðasta ári nam hagnaður Eyris, sem skýrðist af matsbreytingu verðbréfa, rúmlega 162 milljónum evra, jafnvirði um 23 milljarða íslenskra króna. Heildareignir fjárfestingafélagsins námu 1.205 milljónum evra í árslok 2021 en þær samanstanda nánast einungis af 24,7 prósenta hlut Eyris í Marel. Hlutabréfaverð Marels hefur fallið um 28 prósent frá áramótum og hefur ekki verið lægra í tvö ár.

Auk þess að vera stærsti hluthafinn í Marel kemur Eyrir Invest að fjárfestingum í fjölmörgum sprota- og vaxtafyrirtækjum í gegnum félögin Eyrir Sprotar, Eyrir Venture Management og Eyrir Vöxt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.