Sport

Valsfjölskylda gæti hafa varið 250 þúsund krónum í miða á tveimur mánuðum

Sindri Sverrisson skrifar
Stuðningsmenn Vals á öllum aldri hafa skemmt sér vel síðustu vikurnar.
Stuðningsmenn Vals á öllum aldri hafa skemmt sér vel síðustu vikurnar. vísir/Hulda Margrét

Valsarar ætla sér að vera stórveldi í stóru boltagreinunum þremur, hjá konum og körlum, eins og síðustu vikur hafa sýnt svo glögglega. Stuðningsmenn Vals gætu mögulega mætt á 29 heimaleiki á aðeins tveimur mánuðum.

Valur hefur átt fulltrúa í öllum úrslitakeppnunum fjórum í handbolta og körfubolta og á einnig lið í fremstu röð í Bestu deildum karla og kvenna. 

Lið félagsins hafa jafnvel verið að spila þrjá leiki á sama degi og mikið líf og fjör verið á Hlíðarenda, eins og til að mynda í gærkvöld þegar kvennaliðið í handbolta og karlaliðið í körfubolta spiluðu.

Vísitöluvalsfjölskylda gæti því hafa varið 134 þúsund krónum í miðakaup með því að mæta aðeins á heimaleiki Vals í apríl og maí, hjá liðunum sex sem félagið á í handbolta, körfubolta og fótbolta. Miði fyrir fullorðinn kostar í flestum tilvikum 2.000 krónur.

Valsarar hafa getað fagnað mikið síðustu vikur og gætu uppskorið fleiri en einn og fleiri en tvo Íslandsmeistaratitla.vísir/Hulda Margrét

Ef útileikjunum í þessum tveimur mánuðum er bætt við hátt í tvöfaldast upphæðin og nemur 253.000 krónum hjá einni fjölskyldu, með tvo fullorðna og tvö börn. Fjölskyldan þyrfti þá að mæta á alla 55 leikina sem í boði voru og eru á 61 degi í apríl og maí.

Í þessari upphæð er þó gert ráð fyrir því að Valur komist í fimm leikja úrslitaeinvígi í Olís-deild kvenna í handbolta og að til oddaleikja komi í úrslitunum í Olís-deild karla, þar sem Valur mætir ÍBV, og í Subway-deild karla í körfubolta. Valskonur féllu út í undanúrslitum í Subway-deild kvenna en náðu þó að spila tvo heimaleiki.

Við bætist ferðakostnaður og kaup á veitingum

Í upphæðinni er hins vegar aðeins kostnaður við miða. Ekki er gert ráð fyrir ferðakostnaði en stuðningsmenn Vals fá til dæmis tvö tækifæri til að heimsækja Skagafjörð í þessum mánuði. Þá er heldur ekki gert ráð fyrir kostnaði við kalt öl í Fjósinu fyrir leik eða kaupum á hamborgurum og öðru sjoppufæði sem í boði er fyrir fjölskyldur á leikjum á Hlíðarenda og ætti að færa Val helling af krónum í kassann.

Spennan er mikil í úrslitaeinvíginu um Íslandsmeistaratitil karla í körfubolta.vísir/bára

Aðeins dýrara á úrslitin í körfunni

Samkvæmt upplýsingum frá Val er miðaverð á leiki í flestum tilvikum 2.000 krónur og frítt fyrir börn 15 ára og yngri. Þó hefur kostað 2.500 krónur á leiki karlaliðsins í körfubolta sem freistar þess að vinna langþráðan Íslandsmeistaratitil, og 1.000 krónur fyrir börn.

Hér að neðan má sjá heimaleiki Vals á Hlíðarenda í apríl og maí, í handbolta, körfubolta og fótbolta. Mögulegt er að einn bikarleikur bætist við hjá kvennaliðinu í fótbolta.

Heimaleikir Vals í apríl og maí

Kvennalið Vals í handbolta:

  • 3. apríl: Valur – Haukar, deildarleikur
  • 14. apríl: Valur – KA/Þór, deildarleikur
  • 6. maí: Valur – KA/Þór, undanúrslit
  • 12. maí: Valur – KA/Þór, undanúrslit
  • Einnig mögulega:
  • 16. maí: Valur – KA/Þór, undanúrslit
  • 23. maí: Valur – Fram, úrslit
  • 29. maí: Valur – Fram, úrslit

Karlalið Vals í handbolta:

  • 6. apríl: Valur – Haukar, deildarleikur
  • 21. apríl: Valur – Fram, 8-liða úrslit
  • 2. maí: Valur – Selfoss, undanúrslit
  • 8. maí: Valur – Selfoss, undanúrslit
  • 19. maí: Valur – ÍBV, úrslit
  • 25. maí: Valur – ÍBV, úrslit
  • Einnig mögulega:
  • 30. maí: Valur – ÍBV, úrslit

Kvennalið Vals í körfubolta:

  • 4. apríl: Valur – Haukar, undanúrslit
  • 10. apríl: Valur – Haukar, undanúrslit

Karlalið Vals í körfubolta:

  • 5. apríl: Valur – Stjarnan, 8-liða úrslit
  • 11. apríl: Valur – Stjarnan, 8-liða úrslit
  • 23. apríl: Valur – Þór Þ., undanúrslit
  • 6. maí: Valur – Tindastóll, úrslit
  • 12. maí: Valur – Tindastóll, úrslit
  • Einnig mögulega:
  • 18. maí: Valur – Tindastóll, úrslit

Kvennalið Vals í fótbolta:

  • 26. apríl: Valur – Þróttur, deildarleikur
  • 9. maí: Valur – Keflavík, deildarleikur
  • 19. maí: Valur – KR, deildarleikur

Karlalið Vals í fótbolta:

  • 19. apríl: Valur – ÍBV, deildarleikur
  • 30. apríl: Valur – KR, deildarleikur
  • 11. maí: Valur – ÍA, deildarleikur
  • 22. maí: Valur – Víkingur, deildarleikur



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.