Viðskipti erlent

Musk verði forstjóri Twitter eftir kaupin

Samúel Karl Ólason skrifar
Elon Musk, sem talinn er vera auðugasti maður heims.
Elon Musk, sem talinn er vera auðugasti maður heims. AP/Evan Agostini

Auðjöfurinn Elon Musk er sagður ætla að taka við sem forstjóri Twitter um tíma eftir að kaup hans á samfélagsmiðlafyrirtækinu ganga í gegn. Hann er fyrir forstjóri Tesla og stýrir þar að auki SpaceX og Boring Company.

Musk ætlar að kaupa fyrirtækið á 44 milljarða dala. Hann segist meðal annars vilja staðfesta auðkenni allra notenda, útrýma svokölluðum bottum, sjálfvirkum reikningum sem senda óumbeðin skilaboð, og auka málfrelsi á Twitter. Hann hefur verið sakaður um að vilja gefa nettröllum lausan tauminn á Twitter.

Sjá einnig: Musk í­hugar að rukka vissa aðila fyrir notkun Twitter

Samkvæmt heimildum Reuters mun Musk taka við af Parag Agrawal, sem varð forstjóri í nóvember eftir að Jack Dorsey, stofnandi Twitter, steig til hliðar.

Fréttaveitan segir að Musk ætli að fjárfesta kaupin með því að taka lán og tryggja aðkomu fjárfesta. Musk er sagður ætla að taka 6,25 milljarða dala lán út á hlutabréf sín í Tesla, þrettán milljarða lán út á hlut sinn í Twitter og fá 27,25 milljarða í gegnum aðra fjárfesta.

Í frétt CNBC segir að Musk hafi tryggt sér 7,14 milljarða dala með aðkomu annarra fjárfesta.

Meðal þeirra eru prinsinn Alwaleed bin Talal, frá Sádi-Arabíu, rafmyntafyrirtækið Binance, sem stofnað var af Changpeng Zhao frá Kína og er nú með höfuðstöðvar í Caymaneyjum, fjárfestingafélagið Vy Capital frá Dúbaí, fasteignaauðjöfurinn Steven Witkoff, fjárfestirinn Larry Ellison og fleiri.

CNBC hefur eftir heimildarmönnum sínum að Musk hafi sagt mögulegum fjárfestum að tekjur Twitter væru of lágar og of margir væru að vinna hjá fyrirtækinu.

Reuters segir einhverja fjárfesta hafa áhyggjur af því að Musk ætli sér ekki að klára kaupin á Twitter. Fari svo þyrfti Musk að greiða milljarð dala til Twitter og fyrirtækið gæti þar að auki höfðað mál gegn honum.


Tengdar fréttir

Dómari segir Musk hafa logið um að taka Tesla af markaði

Dómari hefur komist að þeirri niðurstöðu að Elon Musk, auðugasti maður heims, laug þegar hann hélt því fram í tístum árið 2018 að hann hefði tryggt sér fjármögnun til að taka bílafyrirtækið Tesla af markaði. Hann sagðist ætla að kaupa öll hlutabréf félagsins á 420 dali á hlut.

Nota gamalt bragð til að grípa til varna gegn yfirtöku Musks

Forsvarsmenn Twitter hafa gripið til varna til að koma í veg fyrir mögulega yfirtöku auðjöfursins Elons Musk á samfélagsmiðlafyrirtækinu. Með það markmið hefur stjórn Twitter notast við gamalt bragð á hlutabréfamarkaðinum sem myndi gera hluti Musks, og annarra, lítils virði.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.