Viðskipti innlent

Verðbólga eykst í 7,2 prósent

Eiður Þór Árnason skrifar
Matarkarfan heldur áfram að hækka.
Matarkarfan heldur áfram að hækka. Vísir/Vilhelm

Vísitala neysluverðs hækkaði um 1,25% í apríl og mælist ársverbólga nú 7,2% en var 6,7% í marsmánuði. Verðbólgan hefur ekki verið meiri frá því í maí 2010 þegar hún mældist 7,50%. Tólf mánaða verðbólga án húsnæðis fer úr 4,6% í 5,3%.

Fram kemur í nýjum tölum Hagstofunnar að verð á mat og drykkjarvörum hafi hækkað um 1,4% milli mars og apríl. Voru áhrif á vísitölu neysluverðs 0,20% en þar af voru mjólkurvörur 0,13%. 

Kostnaður vegna búsetu í eigin húsnæði (reiknuð húsaleiga) hækkaði um 2,4% og hafði 0,45% áhrif á vísitöluna. Verð á flugfargjöldum til útlanda hækkaði um 22,9% og hafði áhrif til hækkunar um 0,37%. 

Greining Íslandsbanka hafði spáð því að vísitala neysluverðs myndi hækka um 0,8% í apríl og að tólf mánaða verðbólga færi úr 6,7% í 6,8%.

Á sama tíma gerði Hagfræðideild Landsbankans ráð fyrir tæplega 0,7% hækkun vísitölunnar milli mars og apríl sem þýddi að ársverðbólga stæði óbreytt í 6,7% milli mars og apríl. 

Peningastefnunefnd Seðlabankans kynnir næstu vaxtaákvörðun sína þann 4. maí og spáir Greining Íslandsbanka því að stýrivextir verði hækkaðir um 0,5 prósentustig úr 2,75% í 3,25%. Sömuleiðis telur bankinn vera talsverðar líkur á því að peningastefnunefnd hækki stýrivexti um 0,75 prósentustig. Þó sé sennilegt að nefndin muni nýta sér það að stutt sé í næstu vaxtaákvarðanir og hækki í smærri skrefum.

Fréttin hefur verið uppfærð.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.