Styttist í Stórmeistaramótið í CS:GO: „Þetta er keppnin sem allir eru búnir að bíða eftir“

Efstu fjögur lið Ljósleiðaradeildarinnar vinna sér inn þátttökurétt á Stórmeistaramótinu. Liðið sem lendir í níunda sæti fer í umspil við annað sæti 1. deildarinnar og tíunda og neðsta liðið fellur beint niður.

Dusty hefur nú þegar tryggt sér deildarmeistaratitilinn og á því öruggt sæti á Stórmeistaramótinu. Þór og Vallea sitja í öðru og þriðja sæti Ljósleiðaradeildarinnar og hafa einnig tryggt þáttökurétt sinn á mótinu, og í gær tryggði Ármann sér fjórða og seinasta lausa sætið.

„Það er bara þannig. Stóri, stóri bikarinn, Íslandsmeistaratitillinn,“ sagði Kristján Einar í útsendingunni í gær. „Dusty er búið að tryggja sér deildarmeistaratitilinn, en Íslandsmeistaratitillinn er enn í boði. Þetta er bara eins og við þekkjum úr körfunni og svona, það er bara hörku úrslitakeppni.“

Tómas tók í sama streng og virtist jafnvel enn spenntari en kollegi sinn.

„Það er nefnilega það sem við viljum,“ sagði Tómas. „Að sjálfsögðu viljum við alveg geggjaða baráttu um þennan Íslandsmeistaratitil því þetta er keppnin sem allir eru búnir að bíða eftir og gíra sig upp í á meðan að tímabilið stendur yfir. Mér sýnist öll liðin vera orðin alveg vel heit.“

Innslagið má sjá í heild sinni í spilaranum hér fyrir neðan.