Fótbolti

Rekinn fyrir að gefa andstæðingi Muay Thai olnbogaskot

Ingvi Þór Sæmundsson skrifar
Aitsaret Noichaiboon gefur Supasan Ruangsuphanimit Muay Thai olnbogaskot.
Aitsaret Noichaiboon gefur Supasan Ruangsuphanimit Muay Thai olnbogaskot.

Fótboltamaður í þriðju efstu deild í Taílandi var rekinn frá liði sínu eftir að hafa ráðist á mótherja og gefið honum svakalegt olnbogaskot.

Aitsaret Noichaiboon brást hinn versti við þegar Supasan Ruangsuphanimit, leikmaður Norður-Bangkok háskólans, sparkaði í hælana á honum í uppbótartíma í leik gegn Bangkok FC um helgina.

Noichaiboon hljóp að Ruangsuphanimit og gaf honum rosalegt olnbogaskot sem væri betur við hæfi í blönduðum bardagalistum.

Noichaiboon fékk að sjálfsögðu rauða spjaldið frá dómara leiksins. Og eftir leikinn rak Bangkok hann frá félaginu.

„Bangkok FC vill taka afstöðu og styður ekki svona lagað. Félagið hefur sagt samningi leikmannsins upp. Félagið biðst afsökunar á atvikinu og mun gera allt til að koma í veg fyrir að þetta gerist aftur,“ sagði í yfirlýsingu frá Bangkok.

Ruangsuphanimit var fluttur á spítala eftir leikinn og sauma þurfti 24 spor í efri vör hans.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.