Mbappé meiddist á æfingu: Gæti misst af stór­leiknum gegn Real

Franski sóknarmaðurinn meiddist á æfingu fyrr í dag samkvæmt fjölda heimilda erlendis. Ljóst er að Real myndi fagna því ef hann yrði ekki með í leik liðanna á miðvikudaginn kemur en fyrir bæði Mbappé sem og PSG yrði það mikið áfall.

Real Madríd gerði allt sem í valdi sínu stóð til að festa kaup á Mbappé síðasta sumar og virðist allt benda til að hann verði leikmaður þeirra þegar tímabilinu lýkur en samningur hans við PSG rennur þá út.

Hann gerði mögulegum yfirmönnum sínum þó enga greiða er Real mætti til Parísar þann 15. febrúar. Mbappé skoraði stórglæsilegt mark sem reyndist sigurmark leiksins eftir að hafa verið allt í öllu í sóknarleik liðsins. 

PSG er því með nauma forystu fyrir síðari leikinn sem fram fer á Santiago Bernabeuu á miðvikudagskvöld. Það er deginum ljósara að PSG er veikara án hins 23 ára gamla Mbappé sem hefur skorað 24 mörk á leiktíðinni og lagt upp 17 til viðbótar í aðeins 34 leikjum.

Leikur Real Madríd verður sýndur beint á Stöð 2 Sport 2. Upphitun hefst klukkan 19.15 og leikurinn sjálfur svo klukkan 20.00.