Formúla 1

Rússneski Formúlu 1 ökumaðurinn Nikita Mazepin rekinn

Kristinn Ásgeir Gylfason skrifar
Nikita Mazepin.
Nikita Mazepin.

Samningi Nikita Mazepin um sæti hjá Haas F1 liðinu í Formúlu 1 hefur verið rift og tekur riftunin gildi samstundis. Riftunin kemur í kjölfar innrásar Rússa inn í Úkraínu. Sömuleiðis hefur samningi Uralkali, aðalstyrktaraðila Haas liðsins verið rift. Uralkali er að miklu leyti í eigu föður Nikita Mazepin, Dmitry Mazepin.

Haas liðið keppir undir bandarísku leyfi og er í eigu Gene Haas, sem einnig á Nascar lið sem hefur náð miklum árangri. „Haas F1 liðið hefur ákveðið að rifta samstundis samningi titil styrktaraðila síns, Uralkali og ökumannssamningi Nikita Mazepin,“ sagði í yfirlýsingu frá Gene Haas vegna málsins.

„Ásamt öðrum í Formúlu 1 samfélaginu er okkur brugðið og við erum sorgmædd yfir innrásinni í Úkraínu og óskum þess að henni ljúki sem fyrst með sem friðsamlegustum hætti,“ bætti Haas við.

Alþjóðaakstursíþróttasambandið (FIA) hafði tekið ákvörðun um að banna rússneskum og hvítrússneskum keppendum að nota þjóðfána sína og skyldu þeir nota hlutlausan fána FIA.

Breska akstursíþróttasambandið tók stærra skref og meinaði rússneskum og hvítrússneskum keppendum þáttöku í mótum félagsins. Sem hefði komið í veg fyrir þátttöku Mazepin í breska kappakstrinum á Silverstone sem dæmi.

Hér að neðan má sjá viðbrögð Nikita Mazepin á Instagram. Hann er ósáttur við ákvörðun liðsins og kveðst hafa verið reiðubúinn að gangast við kröfum FIA.

Haas liðið fjarlægði merkingar Uralkali af keppnis- og sendibílum sínum á meðan á fyrstu æfingum fyrir komandi keppnistímabil stóð í Barcelona í lok febrúar. Formúla 1 hefur nú ákveðið að ekki verði haldin kappakstur í Rússlandi um ókomna tíð.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.