Efnahagsþvinganir farnar að bíta hinn almenna Rússa

Tryggvi Páll Tryggvason skrifar 28. febrúar 2022 23:31

Frá Moskvu í dag. Rúblan hrapaði í verðgildi í dag. Pavel Pavlov/Anadolu Agency via Getty Images)

Afleiðingar efnahagsþvingana sem ríki heimsins hafa sett á Rússa vegna innrásar rússneska hersins í Úkraínu eru farnar að bíta hinn almenna borgara í Rússlandi.

Fréttamenn BBC ræddu við almenna rússneska borgara í dag í Moskvu, höfuðborg Rússlands.

„Ef ég gæti yfirgefið Rússland núna myndi ég gera það. En ég get það ekki vegna vinnunnar,“ hefur BBC eftir hinum 31 árs gamla Andrey sem starfar sem iðnhönnuður.

Þar kemur fram að eftir að stýrivextir voru hækkaðir í tuttugu prósentustig hafi hann ekki lengur efni á að greiða afborganir af húsnæðisláni.

Seðlabanki Rússlands hækkaði stýrivexti úr 9,5 prósentustigum í tuttugu prósentustig til að stemma stigu við gengisfalli rússnesku rúblunnar sem hefur hríðfallið vegna efnahagsaðgerða gegn Rússum vegna innrásarinnar í Úkraínu.

„Ég ætla að reyna að finna mér nýja viðskiptavini erlendis sem fyrst og flytja frá Rússlandi með peningana sem voru eyrnamerktir fyrstu afborguninni,“ hefur BBC eftir Andrey.

Vestræn ríki hafa gripið til umfangsmikilla aðgerða til að refsa Rússum fyrir innrásina. Eigur rússneskra banka hafa verið frystar svo dæmi séu tekin.

Skrúfað fyrir Apple Pay og Google Pay

Aðgerðirnar hafa gert það að verkum að kreditkort frá Visa og Mastercard frá sumum rússneskum bönkum eru óvirk, sömuleiðis greiðsluleiðir á borð við Apple Pay og Google Pay.

Þannig gat Dario, 35 ára verkefnastjóri í Moskvu, ekki notað neðanjarðarlestakerfið borgarinnar í morgun.

„Ég greiði alltaf með símanum en það virkaði ekki. Það voru fleiri sem glímdu við sama vandamál. Það kom í ljós að VTB-bankinn er einn af þeim sem aðgerðirnar beinast gegn og því virkar Apple Pay og Google Pay ekki,“ hefur BBC eftir Dario.

Seðlabankinn Rússlands biðlaði til rússneskra borgara að halda ró sinni í von um að ekki yrðu gerð áhlaup á rússneska banka, það er þegar viðskiptavinir reyna sem flestir að taka út innlán sín hjá bönkunum.

Fylgst er með nýjustu vendingum í Úkraínu í Vaktinni í fréttinni hér að neðan.

„Það eru engir dollarar, engar rúblur, ekkert. Eða jú, það eru rúblur en ég hef engan áhuga á þeim,“ hefur BBC eftir hinum tvítuga Anton sem var í biðröð við hraðbanka þegar fréttamenn BBC ræddu við hann.

„Ég veit ekki hvað gerist næst. Ég er hræddur um að við séum að breytast í Norður-Kóreu eða Íran.“

Það kostar um helmingi meira að kaupa erlendan gjaldeyri í Rússlandi í dag en í síðustu viku. Í byrjun árs fengust 75 rúblur fyrir einn dollara, 80 rúblur fyrir eina evru.

Í dag var staðan þannig að einn dollari var ígildi 113 rúblna og ein evra ígildi 127 rúblna.

Búið er að setja takmörk á það hversu mikið einstaklingar geta tekið út úr bönkum í formi rúblna og mjög lítið er til í bönkum af dollurum og evrum.

Rússland Innrás Rússa í Úkraínu

Tengdar fréttir

Selenskí sækir formlega um aðild að Evrópusambandinu

Forseti Úkraínu hefur skrifað undir formlega umsókn í Evópusambandið en hann kallaði eftir aðild í ávarpi sínu til þjóðarinnar í nótt. Friðaviðræðum Rússa og Úkraínumanna í Hvíta-Rússlandi í dag lauk án niðurstöðu.

28. febrúar 2022 16:27

Rússneskum almenningi blöskri það sem hann sjái

Jón Ólafsson, prófessor og sérfræðingur í málefnum Rússlands, telur að markmið Rússlands næstu daga sé að þrengja verulega að stórborgunum og þéttbýlissvæðum í Úkraínu og ná slíkum tökum á landinu að Úkraínumenn neyðist til að gefast upp. Brátt komi að örlagastund í Úkraínu.

25. febrúar 2022 17:24

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.