Harri ætlaði að hætta í sumar en var rekinn

Harri, eins og hann er kallaður, sagði við Handbolti.is á mánudag að hann hefði ákveðið að nýta uppsagnarákvæði í samningi sínum og hætta þjálfun HK eftir tímabilið, til að taka sér frí frá þjálfun.

Nú er hins vegar orðið ljóst að Harri hættir þegar í stað því HK sendi frá sér yfirlýsingu þess efnis.

„Stjórn handknattleiksdeildar HK hefur ákveðið að ljúka samstarfi sínu við Halldór Harra Kristjánsson og hefur hann látið af störfum sem þjálfari kvennaliðs HK.

Harri hafði ákveðið að láta staðar numið að loknu tímabilinu en það var einhugur hjá stjórn að breytinga væri þörf á þessum tímapunkti.

HK vill þakka Harra kærlega fyrir vel unnin störf á þeim 4 árum sem hann hefur starfað fyrir félagið,“ segir í yfirlýsingu HK.

Síðasti leikur HK undir stjórn Harra var því á miðvikudag þegar liðið tapaði 31-27 á heimavelli gegn KA/Þór. Liðið er í næstneðsta sæti Olís-deildarinnar með níu stig eftir fimmtán leiki, fimm stigum á eftir næstu liðum en í öruggri fjarlægð frá stigalausu liði Aftureldingar sem er neðst.