Handbolti

Hetja Dana: Þurftum að grafa upp myndbönd af Íslendingunum

Ingvi Þór Sæmundsson skrifar
Kevin Møller (nr. 20) reyndist Íslendingum afar erfiður í gær.
Kevin Møller (nr. 20) reyndist Íslendingum afar erfiður í gær. epa/Tibor Illyes

Kevin Møller átti frábæran leik þegar Danmörk sigraði Ísland, 28-24, í milliriðli I á EM í handbolta í gær. Hann segir að undirbúningurinn fyrir leikinn hafi riðlast eftir að lykilmenn íslenska liðsins heltust úr lestinni, hver á fætur öðrum.

Møller kom inn á eftir átján mínútna leik fyrir Niklas Landin sem fann sig ekki. Það gerði Møller hins vegar og varði sautján skot, eða 59 prósent þeirra skota sem hann fékk á sig.

Íslenska liðið var vængbrotið gegn heimsmeisturunum en sex lykilmenn greindust með kórónuveiruna í aðdraganda leiksins. Það flækti undirbúning dönsku markvarðana fyrir leikinn enda mættu þeir leikmönnum sem þeir bjuggust ekki við að mæta.

„Við þurftum að fara í safnið og grafa upp myndbönd af leikjum þeirra með félagsliðum og treysta því. Við höfðum ekki mikið efni frá hverjum og einum,“ sagði Møller eftir leikinn.

„Stundum er líka gott að treysta aðeins á innsæið og þú verður að gera það þegar þú ert markvörður, sérstaklega þegar þú kemur inn af bekknum.“

Danir unnu leikina sína þrjá í riðlakeppninni á EM með samtals þrjátíu marka mun en þurftu að hafa talsvert meira fyrir hlutunum gegn Íslendingum í gær. Íslenska liðið hélt í við það danska lengi vel en á síðustu tíu mínútunum skildu leiðir.

Næsti leikur Danmerkur á EM er gegn Króatíu annað kvöld.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.