Conte: Dyrnar standa Eriksen alltaf opnar

Eins og flestir vita fór Eriksen í hjartastopp í leik danska landsliðsins gegn því finnska á Evrópumótinu síðasta sumar og hefur ekki leikið knattspyrnu síðan.

Hann er í leit að nýju félagi eftir að hafa yfirgefið Ítalíumeistara Inter á dögunum, en lög og reglur ítölsku deildarinnar kveða á um að ekki megi spila þar í landi með ígræddan gangráð.

Eriksen lék einmitt undir stjórn Conte hjá Inter, en það var Conte sem fékk hann til félagsins frá Tottenham. Á seinustu dögum hafa myndskeið af Eriksen sparka í bolta birst og hann segist finna formið koma hægt og rólega til baka og vonast til að spila fyrir danska landsliðið á HM í Katar í vetur.

Conte var spurður út í Eriksen í vikunni og Ítalinn hrósaði leikmanninum í hástert ásamt því að senda honum þau skilaboð að honum sé velkomið að nýta sér æfingaaðstöðu Tottenham, sem þykir ein sú besta í heimi.

„Klárlega, það var frábært að sjá að hann er mættur aftur á völlinn, að sjá hann sparka í bolta,“ sagði Conte.

„Það se, gerðist í sumar var alls ekki gott, ekki gott fyrir fólkið sem vinnur með honum og ekki gott fyrir fólkið sem þekkir hann. Ég var hræddur á þessu augnabliki.“

„En að sjá hann tilbúinn að spila fótbolta aftur eru frábærar fréttir. Ég held að dyrnar standi alltaf opnar fyrir Eriksen,“ sagði Conte að lokum.