Innlent

Áslaug Arna lækar færslu Loga sem lokar á athugasemdir

Hólmfríður Gísladóttir skrifar
Áslaug Arna sagðist sem dómsmálaráðherra trúa þolendum en er sökuð með „lækinu“ um að taka afstöðu með meintum geranda.
Áslaug Arna sagðist sem dómsmálaráðherra trúa þolendum en er sökuð með „lækinu“ um að taka afstöðu með meintum geranda.

Áslaug Arna Sigurbjörnsdóttir, vísinda-, iðnaðar- og nýsköpunarráðherra og fyrrverandi dómsmálaráðherra, hefur verið harðlega gagnrýnd fyrir að læka Facebook-færslu Loga Bergmanns Eiðssonar fjölmiðlamanns frá því í gær, þar sem hann segist iðrast að hafa farið yfir mörk konu en neitar að hafa brotið gegn henni.

Þá vekur athygli að Logi virðist hafa hafa lokað fyrir athugasemdir eða takmarkað hverjir geta tjáð sig um færsluna. Athugasemdir sem áður voru komnar í þráðinn vörðuðu meðal annars læk ráðherra. 

Þegar Áslaug Arna var dómsmálaráðherra sagði hún oftsinnis í viðtölum við fjölmiðla að taka þyrfti á kynferðisbrotum og koma til móts við þolendur. Hún sagði meðal annars í viðtali við fréttastofu í maí í fyrra:

„Ég held að það sé alveg ljóst að þessi bylting er komin til að vera og sem betur fer. Einhverjum kannski var búið að finnast nóg komið af umræðu um #MeToo en þetta er bara komið til að vera og við þurfum að halda áfram að hlusta, læra og gera betur. Það er skylda okkar sem erum kjörin á þing að berjast fyrir betra samfélagi og það á líka við um að líta ekki undan ofbeldi eða áreitni og leggja sitt af mörkum til að bæta umhverfi þolenda.“

Þá sagði hún að veita þyrfti þolendum skjól.

„Og tryggja að kerfið geri það af fagmennsku, hlýju og tillitssemi.“

Áslaug Arna, sem í dag er vísinda-, iðnaðar- og nýsköpunarráðherra, kom einnig fram í myndskeiði þar sem þekktir einstaklingar stigu fram og sögðust trúa þolendum.

Í umræddri færslu neitar Logi að hafa brotið gegn konu sem hefur ásakað hann um kynferðisbrot en viðurkennir að „hafa farið yfir mörk í einkalífi fólks“.

Umrædd kona, Vítalía Lazareva, greindi frá því í samtalsþætti Eddu Falak á dögunum að ástmaður hennar, sem heimildir fréttastofu herma að sé Arnar Grant, hefði boðið manni kynferðislegan greiða frá Vítalíu gegn því að þegja yfir ástarsambandi þeirra.

Umræddur maður er sagður vera Logi, sem viðurkennir að hafa farið inn á hótelherbergið þar sem Vítalía og ástmaðurinn voru saman en neitar að hafa brotið gegn Vítalíu.

„Ég horfi framan í [ástmanninn] þegar vinur hans er að fara niður á mig og ég á að vera að fara niður á hann. Ég horfi í augun á honum, ég er farin að gráta og segi honum að ég vil þetta ekki. Hann segir við mig að þetta verði allt í lagi því hann er með mér,“ sagði Vítalía um atvikið á hótelherberginu.

Athygli vekur að í Facebook-færslu Loga neitar hann því ekki að hafa tekið þátt í kynlífsathöfn á hótelherberginu en hann segist ekki munu tjá sig meira um málið.

Meðal annarra sem hafa „lækað“ færslu Loga eru Ragnheiður Elín Árnadóttir, fyrrverandi iðnaðar- og viðskiptaráðherra, Sigurður Kári Kristjánsson, fyrrverandi þingmaður, Gísli Freyr Valdórsson, fyrrverandi aðstoðarmaður ráðherra, Friðjón R. Friðjónsson almannatengill og Hannes Hólmsteinn Gissurarson.


Tengdar fréttir

Dagurinn sem fimm þjóð­þekktir karl­menn stigu til hliðar

Hún var hröð atburðarrásin í dag þegar fimm þjóðþekktir karlmenn ýmist létu af störfum eða fóru í leyfi í tengslum við ásakanir ungrar konu um að fjórir þeirra hafi brotið á henni á meðan hún átti í ástarsambandi við vin þeirra. 

Segist saklaus en sjá eftir að hafa farið yfir mörk í einkalífi fólks

Fjölmiðlamaðurinn Logi Bergmann Eiðsson segist saklaus af þeim ásökunum sem bornar hafa verið á hann um kynferðislegt ofbeldi í garð ungrar konu. Hann viðurkennir þó að hafa farið yfir mörk í einkalífi fólks með því að hafa farið inn í herbergi sem hann hafi ekki átt að fara inn í.

Telur vendingar dagsins merki um að þol­endum virðist trúað

Tanja Ísfjörð, ein af stjórnarmeðlimum aðgerðarsinnahópsins Öfga, telur að sú atburðarrás sem fór af stað í dag þegar fimm þjóðþekktir einstaklingar stigu til hliðar eftir að hafa verið bendlaðir við mál ungra konu sem sakar þá um að hafa brotið á sér, séu merki um að fólk virðist trúa þolendum.

Logi Bergmann í leyfi frá K100

Fjölmiðlamaðurinn Logi Bergmann Eiðsson, sem stjórnar Síðdegisþættinum á K100, segist ætla að fara í frí. Hann lýsti þessu yfir í upphafi þáttarins klukkan 16 núna síðdegis.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.