Þetta er í fyrsta sinn frá því í byrjun októbermánaðar í fyrra sem Seðlabankinn beitir gjaldeyrisinngripum á markaði.
Gjaldeyrisinngrip Seðlabankans nú koma á sama tíma og verðbólga hefur farið hækkandi – tólf mánaða verðbólga mælist 5,1 prósent – en sterkara gengi krónunnar ætti að öðru óbreyttu að draga úr verðbólguþrýstingi.
Samkvæmt viðmælendum Innherja á gjaldeyrismarkaði keypti Seðlabankinn gjaldeyri fyrir 9 milljónir evra, jafnvirði rúmlega 1.300 milljónir íslenskra króna, til að vinna gegn gengisstyrkingu krónunnar en við lokun markaða í gær stóð gengið gagnvart evru í 146,8 krónum og hafði þá styrkst um liðlega hálft prósent yfir daginn.
Mjög hefur dregið úr inngripum bankans að undanförnu samhliða því að betra jafnvægi hefur náðst á gjaldeyrismarkaði. Á undanförnum tólf mánuðum hefur gengi krónunnar gagnvart evru styrkst um liðlega sex prósent eftir að hafa lækkað talsvert á árinu 2020.
Þegar faraldurinn stóð hvað hæst beitti Seðlabankinn umfangsmiklum gjaldeyrisinngripum, einkum í því skyni að draga úr tímabundnum þrýstingi á gengi krónunnar, en á síðasta ári námu þau samtals að jafnvirði um 76 milljörðum króna. Þar munaði mest um sölu á gjaldeyri fyrir tæplega 50 milljarða en sem hlutfall af heildarveltu á gjaldeyrismarkaði voru samanlögð inngrip bankans rúmlega 21 prósent.
Gjaldeyrisforði Seðlabankans nam tæplega 920 milljörðum króna í lok nóvember, eða sem jafngildir um þriðjungi af landsframleiðslu.
Frá því í ársbyrjun 2017, þegar gjaldeyrisinngripastefna Seðlabankans var endurskoðuð eftir stórfelld kaup á gjaldeyri árin á undan, hefur meginmarkmið stefnunnar verið að minnka snarpar skammtímasveiflur á gengi krónunnar.
Í viðtali við Innherja í nóvember síðastliðnum sagðist Ásgeir Jónsson seðlabankastjóri aðspurður ekki „telja það ráðlegt“ að bankinn myndi reyna að styðja við gengi krónunnar í því skyni að vega upp á móti hækkun verðbólgu og verðbólguvæntingar. Benti hann á að Seðlabankinn vilji ekki vera gerandi á gjaldeyrismarkaði heldur frekar að bregðast við óhóflegum sveiflum hverju sinni.
Hann sagði að gott jafnvægi væri búið að vera gjaldeyrismarkaði að undanförnu sem mætti að einhverju marki má útskýra vegna hreyfinga lífeyrissjóðanna sem virka eins og sjálfvirkur sveiflujafnari fyrir gengið – og það sé af hinu góða.
Litið lengra fram í tímann taldi seðlabankastjóri hins vegar „ekki ólíklegt“ að gengi krónunnar muni styrkjast, einkum þegar ferðaþjónustan kæmi að fullum krafti til baka.
