Innherji

Þjóðarsjóður Kúveit fjárfestir í fasteignafélaginu Eik

Hörður Ægisson skrifar
Garðar Hannes Friðjónsson, forstjóri fasteignafélagsins Eikar.
Garðar Hannes Friðjónsson, forstjóri fasteignafélagsins Eikar.

Þjóðarsjóður Kúveit, einn stærsti fjárfestingasjóður í ríkiseigu í heiminum, fjárfesti í fasteignafélaginu Eik fyrir vel á þriðja hundrað milljónir króna í síðasta mánuði.

Þetta sýnir nýr listi yfir tuttugu stærstu hluthafa félagsins í árslok 2021 en eignarhlutur þjóðarsjóðsins nemur 20 milljónum hluta að nafnvirði, eða sem jafngildir tæplega 0,6 prósentum af útgefnu hlutafé Eikar.

Hlutabréfaverð fasteignafélagsins, sem hefur hækkað um nærri 9 prósent á undanförnum einum mánuði, stóð í 12,7 krónum á hlut við lokun markaða í dag. Markaðsvirði eignarhlutar þjóðarsjóðs Kúveit er því nú rúmlega 250 milljónir króna.

Þjóðarsjóði Kúveit (e. Kuwait Investment Authority) var komið á fót árið 1953 og er hann sá elsti sinnar tegundar sem er starfræktur í heiminum. Eignir sjóðsins nema samtals á sjötta hundrað milljarða Bandaríkjadala, sem jafngildir meira en tuttugufaldri landsframleiðslu Íslands.

Sjóðurinn hefur á undanförnum mánuðum verið að auka við fjárfestingar sínar í skráðum félögum í Kauphöllinni. Í síðasta mánuði upplýsti Innherji um að hann hefði bætt verulega við hlut sinn í Arion banka og næmi markaðsvirði bréfa sjóðsins í bankanum nú um tveimur milljörðum króna.

Ísland var formlega tekið inn í vaxtamarkaðsvísitölu MSCI undir lok maí á liðnu ári ári og í kjölfarið fór að bera á talsverðu innflæði á hlutabréfamarkaðinn, einkum í bréf Arion og Marel.

Í byrjun desember fengu íslensku kauphallarfélögin enn meiri vigt í vísitölunni en áður og ný félög – Íslandsbanki og Síldarvinnslan – bættust sömuleiðis við. Þannig er Arion orðið tuttugasta stærsta félagið í vísitölunni með 1,5 prósenta vigt.

Stærsti hluthafi Eikar er eignarhaldsfélagið Brimgarðar, bæði í gegnum eigið félag og framvirka samninga, með vel yfir fjórðungshlut í fasteignafélaginu. Aðrir helstu hluthafar Eikar eru Gildi, Lífeyrissjóður verslunarmanna, Almenni lífeyrissjóðurinn og Birta.

Hlutabréf Eikar hækkuðu um liðlega 33 prósent á síðasta ári og stendur markaðsvirði félagsins í dag í 43 milljörðum króna.


Tengdar fréttir

Kauphöllin laðar til sín tugi milljarða ef íslensk bréf færast upp um flokk hjá FTSE

Góðar líkur eru á því að íslenski hlutabréfamarkaðurinn verði færður upp um flokk hjá vísitölufyrirtækinu FTSE Russell á næsta ári og má þá búast við innflæði upp á tugi milljarða króna frá erlendum sjóðum sem haga fjárfestingum sínum í samræmi við vísitölur fyrirtækisins. Þetta segir Magnús Harðarson, forstjóri Kauphallarinnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×