Viðskipti innlent

Milljarða tjón vegna saknæmrar háttsemi dómara

Tryggvi Páll Tryggvason skrifar
TF-GPA var kyrrsett vegna skuldar WOW við Isavia
TF-GPA var kyrrsett vegna skuldar WOW við Isavia Vísir/Vilhelm

Íslenska ríkið og bandaríska flugvélaleigan ALC hafa verið dæmt til að greiða Isavia 2,5 milljarða króna í tengslum við deilu Isavia og ALC um yfirráð yfir flugvél flugfélagsins sáluga Wow air. Héraðsdómur Reykjavíkur telur að dómari við Héraðsdóm Reykjanes hafi komist að rangri niðurstöðu með saknæmum hætti í deilunni.

Málið má rekja til deilna Isavia og ALC um yfirráð yfir Airbus þotu Wow Air. Isavia hafði kyrrsett þotuna árið 2019 vegna skulda flugfélagsins Wow air sem varð gjaldþrota sama ár. ALC, sem eigandi flugvélarinnar, taldi hins vegar að Isavia mætti ekki halda vélinni sem tryggingu vegna gjaldþrots annars félags, Wow air.

Þotunni var flogið burt eftir niðurstöðu Héraðsdóms Reykjaness

Málið kom til kasta dómstóla hér á landi en endaði á því að Héraðsdómur Reykjavíkur úrskurðaði að Isavia hafi aðeins verið heimilt að kyrrsetja umrædda vél vegna greiðslna sem tengdust vélinni sjálfri, ekki heildarskuldar Wow air við Isavia.

Tekið var fram í úrskurði Héraðsdóms að réttaaráhrif úrskurðarins frestuðust ekki þó málinu yrði skotið til Landsréttar og síðar Hæstaréttar, sem Isavia gerði. Það gerði það að verkum að ALC greiddi gjöldin sem tengdust vélinni og var henni að lokum snarlega flogið af landi brott.

Isavia sætti sig ekki við þessa niðurstöðu og stefndi íslenska ríkinu og ALC til greiðslu 2,2 milljarða skaðabóta vegna málsins. Taldi Isavia að úrskurði sínum hafi dómari við Héraðsdóm Reykjaness sýnt af sér saknæma og ólögmæta háttsemi við úrlausn málsins. Félagið hafi verið svipt tryggingu fyrir umræddri skuld.

Dómarinn hafi sýnt af sér saknæma háttsemi

Niðurstaða fékkst í málið í gær og komst Héraðsdómur Reykjavíkur af því að dómur Héraðsdóms Reykjaness hafi verið rangur og byggður á röngum forsendum vegna saknæmra mistaka dómara málsins.

Vinnuvélum var komið fyrir svo vélin gæti ekki farið af landi brott.Visir/Vilhelm

Segir í niðurstöðu Héraðsdóms Reykjavíkur að dómarinn í Héraðsdómi Reykjaness hafi litið framhjá rökstuðningi Landsréttar, æðri réttar, í sama máli og haldið sig við túlkun á lagaákvæði sem gengi í berhögg við túlkun Landsréttar.

Telur Héraðsdómur Reykjavíkur einnig að umræddur héraðsdómari hafi sýnt af sér saknæma háttsemi er hann féllst ekki á kröfu um að málskot myndi fresta aðfarargerð á grundvelli úrskurðarins. Segir að dómarinn hafi mátt vita að rétta væri að fresta aðfararaðgerðinni þar til niðurstaða æðri dómstóls lægi fyrir.

Með þessu hafi íslenska ríkið og ALC bakað Isavia tjón upp á rúma 2,5 milljarða króna. Þá þarf íslenska ríkið einnig að greiða Isavia 15 milljónir vegna málskostnaðar.


Tengdar fréttir

Isavia stefnir íslenska ríkinu og ALC

Isavia hyggst á næstu dögum stefna íslenska ríkinu og flugvélaleigufélaginu Air Lease Corporation (ALC) fyrir Héraðsdómi Reykjavíkur.

Hæstiréttur staðfestir úrskurð Landsréttar

Hæstiréttur hefur staðfest úrskurð Landsréttar sem hafnaði kröfu Isavia um að fá úrskurð Héraðsdóms Reykjaness felldan úr gildi þess efnis Isavia yrði að afhenda bandaríska leigufélaginu ALC Airbus-þotu sem Isavia hafði kyrrsett gegn öllum skuldum flugfélagsins WOW air.

Forstjórinn segir hald sem Isavia hafði vegna skuldar WOW air flogið í burtu

Forstjóri Isavia segir að það hald sem félagið hafði vegna tveggja milljarða króna skuldar WOW air hafi flogið í burtu í morgun þegar flugvél ALC leigusalans yfirgaf Ísland. Mikilvægt sé að Landsréttur taki til meðferðar kæru Isavia vegna úrskurðar héraðsdóms í vikunni um að eigandinn fengi vélina sína afhenta á ný.

Þota ALC farin af landi brott

Þotan sem Isavia kyrrsetti í mars og hefur verið miðpunktur dómsmála síðustu mánuði yfirgaf Keflavíkurflugvöll í morgun.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.