Viðskipti innlent

Veitinga­menn fá einnig undan­þágu frá hertum tak­mörkunum

Eiður Þór Árnason skrifar
Willum Þór Þórsson heilbrigðisráðherra kynnti nýjar sóttvarnaaðgerðir að loknum ríkisstjórnarfundi í gær.
Willum Þór Þórsson heilbrigðisráðherra kynnti nýjar sóttvarnaaðgerðir að loknum ríkisstjórnarfundi í gær. vísir/vilhelm

Willum Þór Þórsson heilbrigðisráðherra hefur ákveðið að veita veitingastöðum undanþágu frá hertum samkomutakmörkunum á morgun.

Veitingastöðum verður heimilt að taka á móti 50 gestum í rými á Þorláksmessu í stað 20 líkt og kveðið er á um í nýju reglugerðinni sem tekur gildi nú á miðnætti.

Þetta kemur fram í tilkynningu frá heilbrigðisráðuneytinu en í gær var greint frá því að ráðuneytið hefði veitt sambærilegar undanþágur vegna tónleika sem fram fara á Þorláksmessu. Í kjölfarið óskuðu Samtök fyrirtækja í veitingarekstri eftir undanþágu á sóttvarnarráðstöfunum fyrir hönd ríflega 130 fyrirtækja til að lágmarka tjón sem hlýst af aðgerðunum. 

Að sögn ráðuneytisins er undanþágan veitt til að gæta meðalhófs í ljósi þess hve skammur fyrirvari er á gildistöku hertra sóttvarnaaðgerða, en ráðherra kynnti þær í gær.

Rekstraraðilum verður áfram skylt að viðhafa allar aðrar sóttvarnaráðstafanir sem kveðið er á um í nýju takmörkununum á morgun. Veitingastöðum ber því að loka klukkan 21.

Rekstraraðilar eru hvattir til að gæta áfram ýtrustu sóttvarnaráðstafana, svo sem að tryggja gott aðgengi að handspritti, tryggja grímunotkun og gæta að eins metra nálægðarmörkunum milli ótengdra aðila.

Betra að sleppa undanþágum

Þórólfur Guðnason sóttvarnalæknir sagði í samtali við fréttastofu fyrr í dag að hann telji að betri árangur náist í baráttunni við kórónuveiruna með því að halda sig við þær samkomutakmarkanir sem ákveðnar hafa verið.

„Við komum náttúrulega með þessar tillögur fyrir augum að við teldum að það þyrfti að takmarka,“ sagði Þórólfur. Lokaákvörðun liggji hjá stjórnvöldum þegar kemur að reglugerðum og undanþágum.

„Síðan er það stjórnvalda að gefa þessar undanþágur og skoða þá aðra þætti og þau gera það og það er endanleg niðurstaða á því. Auðvitað held ég við hefðum náð betri árangri með því að hafa takmarkanir en eins og ég segi þá þurfa stjórnvöld að skoða aðra þætti líka sem vegur þá inn í þeirra endanlegu niðurstöðu.“

Búið að gera ráð fyrir Þorláksmessuös

Björn Árnason, stjórnarmaður í Samtökum fyrirtækja í veitingarekstri, sagði í dag ljóst að ekki væri unnt að bregðast við nýjum sóttvarnareglum með svo skömmum fyrirvara án mikils tjóns.

„Staðir í veitingageiranum eru búin að gera ráð fyrir þessum degi, að fá að vera opið til tíu og gestir að sitja inni til ellefu, og vera með þessi 50 manna takmörk. Það er bara gríðarlegt tap fyrir þessi fyrirtæki, bæði hráefnis missir og tekjutap fyrir starfsfólk, að missa úr stóran hluta af þessu stóra kvöldi sem Þorláksmessa er,“ sagði Björn.

Fréttin hefur verið uppfærð.


Tengdar fréttir

Óska eftir undan­þágu fyrir ríf­lega 130 fyrir­tæki á veitinga­markaði

Samtök fyrirtækja í veitingarekstri hafa nú fyrir hönd ríflega 130 fyrirtækja óskað eftir undanþágu á sóttvarnarráðstöfunum til að lágmarka tjón sem hlýst af aðgerðunum. Stjórnarmaður samtakanna segir fordæmi fyrir slíkum undanþágum en heilbrigðisráðuneytið er nú með beiðnina til skoðunar

For­sendur undan­þágu fyrir tón­leika gildi einnig um veitinga­húsin

Framkvæmdastjóri Samtaka ferðaþjónustunnar segir það skjóta skökku við að heilbrigðisyfirvöld hafi veitt tónleikahöldurum undanþágu frá sóttvarnaraðgerðum þar sem samtökin hafi ítrekað óskað eftir undanþágum án árangurs. Forsendur þess að undanþágur voru veittar fyrir tónleikahaldi geti einnig átt við um veitingarekstur.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.