Viðskipti innlent

Óska eftir undan­þágu fyrir ríf­lega 130 fyrir­tæki á veitinga­markaði

Fanndís Birna Logadóttir skrifar
Frá og með miðnætti í kvöld verður tuttugu manna samkomubann í gildi á landinu öllu. 
Frá og með miðnætti í kvöld verður tuttugu manna samkomubann í gildi á landinu öllu.  Vísir/Vilhelm

Samtök fyrirtækja í veitingarekstri hafa nú fyrir hönd ríflega 130 fyrirtækja óskað eftir undanþágu á sóttvarnarráðstöfunum til að lágmarka tjón sem hlýst af aðgerðunum. Stjórnarmaður samtakanna segir fordæmi fyrir slíkum undanþágum en heilbrigðisráðuneytið er nú með beiðnina til skoðunar

Samtök fyrirtækja á veitingamarkaði, SVEIT, sendu í morgun bréf á heilbrigðisráðherra þar sem óskað er eftir undanþágu frá hertum sóttvarnareglum fyrir hönd 130 veitingahúsa víðs vegar af landinu.

Hertar reglur taka gildi á miðnætti í kvöld en þar er kveðið á um 20 manna samkomutakmörk, með möguleikann á 200 manna hraðprófsviðburðum, tveggja metra reglu og styttan opnunartíma veitinga- og skemmtistaða.

Björn Árnason, stjórnarmaður í SVEIT, segir ljóst er að ekki er unnt að bregðast við nýjum sóttvarnareglum með svo skömmum fyrirvara án mikils tjóns.

„Staðir í veitingageiranum eru búin að gera ráð fyrir þessum degi, að fá að vera opið til tíu og gestir að sitja inni til ellefu, og vera með þessi 50 manna takmörk. Það er bara gríðarlegt tap fyrir þessi fyrirtæki, bæði hráefnis missir og tekjutap fyrir starfsfólk, að missa úr stóran hluta af þessu stóra kvöldi sem Þorláksmessa er,“ segir Björn.

Hann segir fordæmi fyrir því að veita undanþágu þar sem Þorláksmessutónleikar Bubba Morthens og Jólavinatónleikar Emmsjé Gauta fá að fara fram á morgun, þá samkvæmt fyrri sóttvarnareglum.

Þá hafi það ekki sýnt sig sérstaklega í þessari bylgju að fólk sé líklegra til að smitast á veitingastöðum eða krám.

„Það er miklu meiri umgangur fólks á svona tónleikum heldur en nokkurn tímann þegar þú ferð inn á veitingastað eða krá þar sem er setið í sæti, þannig ég myndi segja að það væri mun öruggara ef eitthvað er að fara á veitingahús heldur en tónleika eða stórskemmtun,“ segir Björn.

„Jafnvel þó að þú sért búinn að taka próf, því að það er búið að sýna sig þar líka að þó að fólk fari í hraðpróf og allt þetta, þá eru að koma upp smit á þessum skemmtunum,“ segir Björn enn fremur.

Samtökin hafa fengið þau svör frá heilbrigðisráðuneytinu að beiðnin sé nú til skoðunar og bindur Björn vonir við það að fallist verði á beiðnina.

„Við vonum bara að hann taki vel í þetta og hlusti á það sem við erum að biðja um, þetta er í raun bara frestun á þessum aðgerðum um einn sólarhring og við sjáum í rauninni ekki hversu miklu það ætti að breyta að fá einn dag í viðbót,“ segir Björn.

„Þorláksmessa er bara á morgun þannig að það er voða lítill biðtími í rauninni því það liggur mikið undir hjá fyrirtækjum sem eru búin að kaupa hráefni, það er búið að undirbúa mat, og það er margt sem liggur þarna undir.“


Tengdar fréttir

Jómfrúin óskar líka eftir undanþágu

Rekstraraðilar Jómfrúarinnar í Lækjargötu hafa óskað eftir undanþágu frá takmörkunum á samkomum vegna Þorláksmessu. Jakob E. Jakobsson, eigandi Jómfrúarinnar, segir beiðni veitingastaðarins fullkomlega sambærilega þeim undanþágum sem hafi verið veittar.

Bubbi fær undan­þágu á Þor­láks­messu: „Ég trúi á jóla­sveininn“

Þorláksmessutónleikar Bubba Morthens fara fram með óbreyttu sniði í Hörpu á fimmtudag þrátt fyrir tilkomu hertra samkomutakmarkanna. Hefur fengist undanþága frá reglunum á grundvelli þess að tónleikahaldarar hafi ekki haft rými til að bregðast við breytingunum með svo stuttum fyrirvara.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.