Þórsarar lögðu Ármann

Snorri Rafn Hallsson skrifar
Þór - Ármann

Bæði Þór og Ármann hafa átt í vissu basli undanfarið. Ármann byrjaði tímabilið brösuglega en náði sér svo á skrið með tilkomu Pallab0nda í liðið en eftir að hann skipti yfir til Dusty hefur lukka liðsins dalað örlítið. Þórsarar hófu tímabilið af krafti og unnu alla sína leiki þar til liðið laut í lægra haldi fyrir Dusty í sjöundu umferð og tapaði svo þremur af síðustu fjórum leikjum sínum. Virðist Dusty vera ákveðinn samnefnari í þessari jöfnu. Eins og vanalega var til mikils að vinna fyrir bæði lið, Þór gat skilið sig örlítið betur frá miðju deildarinnar og með sigri í gærkvöldi hefði Ármann getað jafnað XY að stigum í þriðja og fjórða sæti deildarinnar. Fyrri viðureign liðanna fór fram í Dust 2 kortinu þar sem Þór vann 16-9 en í þetta skiptið mættust þau í Overpass og má segja að þar hafi Þór strax farið með sigur í kortavalinu.

Þór bætti um betur og vann hnífalotuna og byrjaði því í vörn (Counter-Terrorists). Fyrstu sex loturnar féllu Þór í vil þar sem liðið mætti Ármanni framarlega og Dell1 fékk tækifæri til að láta handsprengjum og molotov-kokteilum rigna yfir grunlausa leikmenn Ármanns. Honum til aðstoðar voru Instant og Allee sem felldu ótal leikmenn og StebbiC0C0 var mjög hreyfanlegur og liðtækur í hjálpinni. Eftir sex lotur var staðan því 6-0 og Þór með 30 fellur gegn einungis 9 fellum Ármanns. Hvorki gekk né rak í sókninni hjá Ármanni sem var dreifð og marklaus og því auðvelt fyrir Þórsara að skapa sér færi og vera árásargjarnir í vörninni. 

Staða í hálfleik: Þór 12 - 3 Ármann

Líkt og í leiknum gegn Vallea í síðustu umferð var lið Ármanns öllu betra í vörninni. Eftir fjórar lotur í síðari hálfleik hafði Þórsurum ekki tekist að bæta neinum stigum á töfluna og til að kóróna allt saman nældi Kruzer sér í ás í nítjándu lotu með því að fella alla leikmenn Þórs einn síns liðs. Þá settu Þórsarar í hærri gír og sóttu hraðar með góðum árangri. Í tuttugustu og þriðju lotu leit út fyrir að Þórsarar væru búnir að tryggja sér sigurinn en Vargur bjargaði lotunni fyrir horn með þrem fellum á Deiglunni. En þrátt fyrir góða takta þá vinnast leikir ekki bara með skemmtilegum lotum og stöku einstaklingsframtaki. Heilt á litið lék Þór miklu betur og af meira öryggi og sigur þeirra því vel verðskuldaður.

Lokastaða: Þór 16 - 8 Ármann

Það lítur út fyrir að hið beitta Þórslið sé mætt aftur til leiks og að lukka þeirra fari nú sígandi. Eftir jólafrí tekur Þór á móti XY. Lið Ármanns, sem ekki hefur tekist að byggja upp nægan stöðugleika til að landa sigrum trekk í trekk tekur hins vegar á móti Sögu í janúar. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.