Gray hetja E­ver­ton eftir að VAR virtist ætla að stela senunni

Runólfur Trausti Þórhallsson skrifar
Demarai Gray í þann mund að tryggja Everton dýrmætan sigur.
Demarai Gray í þann mund að tryggja Everton dýrmætan sigur. Martin Rickett/Getty Images

Everton vann hádramatískan 2-1 sigur á Arsenal í eina leik kvöldsins í ensku úrvalsdeildinni í kvöld. Dómgæsla leiksins – og myndbandsdómgæsla – var hins vegar í brennidepli framan af leik.

Áður en Martin Ødegaard kom gestunum yfir undir lok fyrri hálfleiks hafði Richarlison komið boltanum í netið fyrir heimamenn. Markið var hins vegar dæmt af eftir að hafa verið skoðað í af myndbandsdómara leiksins.

Þá hafði Ben Godfrey á einhvern ótrúlegan hátt sloppið við spjald eftir að hafa sett hægri fót sinn í andlitið á Takehiro Tomiyasu. Arsenal var hins vegar 1-0 yfir er flautað var til loka fyrri hálfleiks á Goodison Park og bæði lið voru enn fullskipuð.

Þegar tæp klukkustund var liðin af leiknum kom Richarlison knettinum aftur í netið og aftur var dæmd rangstaða. Svo virðist sem Brasilíumaðurinn hafi verið hársbreidd fyrir innan, í orðsins fyllstu merkingu.

Þegar tíu mínútur lifðu leiks kom Richarlison boltanum í netið í þriðja sinn og loksins loksin stóð markið. Allt er þegar þrennt er eins og skáldið sagði.

Staðan orðin 1-1 og stefndi í að það yrði lokatölur leiksins. Demarai Gray var hins vegar ekki alveg sömu skoðunar. Í uppbótartíma fékk hann sendingu frá André Gomes og óð í átt að marki. Er Gray nálgaðist D-bogann lét hann vaða af öllum krafti og boltinn söng í stöng og inn.

Staðan orðin 2-1 og reyndust það lokatölur leiksins. Everton lyftir sér upp í 12. sæti deildarinnar með 18 stig að loknum 15 leikjum á meðan Arsenal er í 7. sæti með 23 stig.

Bein lýsing

Leikirnir






    Fleiri fréttir

    Sjá meira