Innlent

Ráðu­neytið skoðar áfram mál Hugar­afls þvert á yfir­lýsingar lög­manns

Eiður Þór Árnason skrifar
Ásmundur Einar Daðason félags- og barnamálaráðherra hefur áður sagt að til skoðunar sé hvort og þá til hvaða ráðstafana verði gripið í máli Hugarafls.  
Ásmundur Einar Daðason félags- og barnamálaráðherra hefur áður sagt að til skoðunar sé hvort og þá til hvaða ráðstafana verði gripið í máli Hugarafls.   Vísir/Vilhelm

Félagsmálaráðuneytið hefur enn til skoðunar ásakanir fyrrum félagsmanna Hugarafls um eitraða menningu hjá samtökunum. Þetta kemur fram í skriflegu svari ráðuneytisins til fréttastofu.

Sævar Þór Jónsson, lögmaður Hugarafls, sendi á dögunum bréf til annarra félagasamtaka þar sem hann fullyrti að ráðuneytið ætlaði ekki að rannsaka ásakanirnar. Hann segir í samtali við fréttastofu að félagsmálaráðuneytið sé tvísaga í málinu og að fyrri yfirlýsingar hans hafi byggt á svari ráðuneytisins.

„Það er mjög bagalegt að ráðuneytið skuli gefa út þessa yfirlýsingu þegar það og lögfræðingur ráðuneytisins er búið að vera í samskiptum við okkur og lýsa því yfir að það sé ekkert stjórnsýslumál í gangi,“ segir Sævar.

Sævar Þór Jónsson lögmaður.Vísir/Vilhelm

Segja einelti hafa þrifist innan samtakanna

Sex fyrrverandi félagsmenn Hugarafls sendu í ágúst greinargerðir á ráðuneytið vegna starfs- og stjórnunarhátta samtakanna. Hugarafl eru félagasamtök fólks sem hefur upplifað persónulega krísu og vinnur að bata sínum. 

Fyrrverandi félagsmenn segja framkomu stjórnenda hafa verið eitraða og að hún hafi meðal annars lýst sér í einelti og ógnarstjórnun gegn almennum félagsmönnum. Forsvarsmenn Hugarafls hafa frá upphafi hafnað ásökununum. 

Ásmundur Einar Daðason félags- og barnamálaráðherra sagði í september að til skoðunar væri hvort og þá til hvaða ráðstafana yrði gripið vegna athugasemdanna.

Í svari sem barst frá félagsmálaráðuneytinu í dag segir að það hafi í þrígang fundað með fyrrum félagsmönnum Hugarafls sem afhentu ráðuneytinu greinagerðirnar. Fleiri félagsmenn Hugarafls, bæði núverandi og fyrrverandi, hafi í kjölfarið sett sig í samband við ráðuneytið og lýst upplifun sinni af Hugarafli. 

Fram kemur í svari ráðuneytisins að sömuleiðis liggi fyrir upplýsingar sem tengist þjónustusamningi Vinnumálastofnunar við Hugarafl.

Vilja óháða úttekt

Stjórnendur Hugarafls hafa óskað eftir því að félagsmálaráðuneytið láti gera óháða úttekt á starfsemi félagasamtakanna. Að sögn ráðuneytisins hefur það ekki rætt við stjórnendur Hugarafls með hliðsjón af fyrirliggjandi ábendingum á meðan ósk samtakanna um óháða úttekt er til skoðunar.

Hafa verið teknar ákvarðanir um hvernig skal bregðast við þessum ábendingum sem ráðuneytið sagðist vera með til skoðunar og tæki alvarlega?

„Þar sem málið er enn í skoðun hjá félagsmálaráðuneytinu er of snemmt að segja hvað gert verður við þær upplýsingar sem koma úr þeirri vinnu, annað en það að niðurstöðurnar verða teknar alvarlega og þær nýttar til þess að meta hvaða aðgerða, ef einhverra, þarf að grípa til í framhaldinu,“ segir í skriflegu svari félagsmálaráðuneytisins.

Lagt fram kæru

Sævar Þór Jónsson, lögmaður Hugarafls, sagði í síðustu viku að félagið hafi lagt fram kæru hjá lögreglu vegna alvarlegra hótana í garð starfsfólks og stjórnarmanna Hugarafls.

Félagsmálaráðuneytið styrkti Hugarafl um átta milljónir króna í lok síðasta árs. Sá styrkur snýr að rekstri opins úrræðis þetta ár og það næsta.

Stefán Þór Stefánsson tjáði sig um reynslu sína af starfsemi Hugarafls í Íslandi í dag í september. Hann kynntist Hugarafli árið 2015, varð virkur í starfsemi og kynnist unnustu sinni sem svipti sig lífi fyrr á árinu. Unnustan, Tinna Finnsdóttir, hafði verið skjólstæðingur Hugarafls og er að sögn Stefáns ein þeirra sem hlaut mjög ómaklega meðferð af hálfu stjórnenda samtakanna.

Horfa má á viðtalið við Stefán í spilaranum hér fyrir neðan.

Fréttin hefur verið uppfærð.


Tengdar fréttir

Hefur kært hótanir í garð Hugar­afls­fólks til lög­reglu

Lögmaður Hugarafls segir félagsmálaráðuneytið ekki ætla að rannsaka ásakanir fyrrum skjólstæðinga um eitraða menningu frekar. Fyrrum skjólstæðingur segist ekki hafa fengið þau svör þrátt fyrir ítrekaðar fyrirspurnir til ráðuneytisins. Hann fullyrðir að þau muni fara með málið lengra.

Kvarta yfir „eitraðri framkomu“ stjórnenda Hugarafls

Sex fyrrverandi skjólstæðingar grasrótarsamtakanna Hugarafls sendu nýverið greinargerðir á félagsmálaráðuneytið vegna starfs- og stjórnunarhátta samtakanna og framkomu formanns gagnvart félagsmönnum. Hópurinn segir framkomu stjórnenda samtakanna eitraða og hún lýsi sér meðal annars í einelti og ógnarstjórnun gegn almennum félagsmönnum.

Til skoðunar hvort gripið verði til aðgerða vegna Hugarafls

Félagsmálaráðherra segir til skoðunar hvort og þá til hvaða ráðstafana verði gripið vegna athugasemda fyrrverandi skjólstæðinga grasrótarsamtakanna Hugarafls við framkomu stjórnenda þar á bæ. Einelti og ógnarstjórnun eru orð sem skjólstæðingarnir nota til að lýsa framkomu stjórnenda Hugarafls.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.