Selur hlutabréf til að borga tvö þúsund milljarða í skatta

Nú er þó komið í ljós að Musk stendur frammi fyrir gífurlega háum skattareikningi og hefði líklegast þurft að selja hlutabréf sín hvort sem er.

Reikningurinn er upp á fimmtán milljarða dala, sem samsvarar tæpum tveimur billjónum króna, eða tvö þúsund milljörðum króna (2.000.000.000.000). Hann er, samkvæmt frétt CNBC, til kominn vegna hlutabréfakaupréttar Musks frá árinu 2012.

Sjá einnig: Selur tíu prósent af hlut sínum í Tesla... ef hann er maður orða sinna

Musk fær hvorki laun né bónusa frá Tesla og er auður hans tilkominn vegna hlutabréfaeigna hans í fyrirtækinu, sem hefur aukist gífurlega í virði á undanförnum árum. Árið 2012 fékk hann kauprétt á 22,8 milljónum hluta á 6,24 dali stykkið. Hluturinn var metinn á 1.222,09 dali við lokun markaða vestanhafs á föstudaginn.

Það felur í sér hagnað upp á 28 milljarða dala fyrir Musk (3,7 billjónir króna).

Musk sagði sjálfur um helgina að þar sem hann fengi ekki laun frá Tesla væri eina leið hans til að greiða skatta að selja hlutabréf. Hann hefur þó ekki staðfest upphæð greiðslunnar sem hann þarf að greiða.

CNBC segir einnig frá því að á ráðstefnu í september hafi Musk sagt að vegna þess að kaupréttur hans á hlutabréfum væri að renna út snemma á næsta ári myndi hann líklega selja mikið magn hlutabfréfa á síðasta fjórðungi þessa árs.