Körfubolti

Durant skipti út martraðarminningu með góðum leik og góðum sigri

Óskar Ófeigur Jónsson skrifar
Kevin Durant með boltann í leiknum á móti Toronto Raptors en Fred VanVleet er til varnar.
Kevin Durant með boltann í leiknum á móti Toronto Raptors en Fred VanVleet er til varnar. AP/Frank Gunn

Brooklyn Nets er komið á mikið skrið í NBA-deildinni í körfubolta, Golden State Warriors heldur áfram frábærri byrjun sinni á tímabilinu en það gengur lítið sem ekkert hjá meisturum Milwaukee Bucks.

Kevin Durant og James Harden áttu báðir góðan leik þegar Brooklyn Nets vann 116-103 útisigur á Toronto Raptors. Durant var með 31 stig, 7 fráköst og 7 stoðsendingar en Harden skoraði 16 af 28 stigum sínum í fjórða leikhlutanum og var einnig með 10 fráköst og 8 stoðsendingar.

Brooklyn liðið fékk einnig 14 stig og 11 fráköst frá Blake Griffin og hefur nú unnið fimm leiki í röð. Þetta var fyrsti sigur Steve Nash sem þjálfara í sínu heimalandi en hann er kanadískur.

Durant skoraði yfir tuttugu stig í tíunda leiknum í röð og bætti áfram félagsmetið yfir slíkt í byrjun tímabils. Hann var þarna að spila í fyrsta sinn í Toronto síðan að hann sleit hásinina á þessu gólfi í lokaúrslitum NBA-deildarinnar árið 2019.

„Síðast þegar ég var hérna var ein mín lægtsta stund sem körfuboltamanns. Það er gott að snúa hingað aftur spilandi og sjá áhorfendur,“ sagði Kevin Durant.

Jordan Poole skoraði 15 af 25 stigum sínum í fyrsta leikhluta þegar Golden State Warriors vann 120-107 sigur á Houston Rockets en þetta var fjórði sigur liðsins í röð og sá áttundi í níu leikjum á tímabilinu.

Stephen Curry bætti við 20 stigum, Andrew Wiggins var með 16 stig og Draymond Green skoraði 6 stig, tók 8 fráköst og gaf 9 stoðsendingar. Jae'Sean Tate var með 21 stig og 10 fráköst í áttunda tapleik Houston í röð.

Bradley Beal skoraði 30 stig þegar Washington Wizards vann 101-94 á meisturum Milwaukee Bucks. Wizards liðið vann þarna sinn sjöunda sigur i tíu leikjum og hefur ekki byrjað betur síðan 2014-15 tímabilið.

Aðra sögu eru að segja að meisturum Bucks. Giannis Antetokounmpo var með 29 stig og 18 fráköst en kom ekki í veg fyrir fimmta tap liðsins í síðustu sex leikjum.

Cole Anthony skoraði 24 af 33 stigum sínum í seinni hálfleik þegar Orlando Magic vann Utah Jazz 107-100. Utah liðið tapaði þarna annað kvöldið í röð eftir að hafa unnið sjö af fyrstu átta leikjum sínum. Donovan Mitchell skoraði 21 stig fyrir Utah og Rudy Gobert var með 21 stig og 15 fráköst.

Ricky Rubio skoraði 37 stig þegar Cleveland Cavaliers vann 126-109 sigur á New York Knicks í Madison Square Garden en þetta er það mesta sem Spánverjinn hefur skorað í einum leik í deildinni. Hann hafði mest skorað 34 stig í einum leik fyrir þennan leik. Cleveland liðið hefur nú unnið fjóra leiki í röð og sjö af ellefu leikjum.

Rubio kom inn af bekknum og gaf einnig tíu stoðsendingar í leiknum. Hann er fyrsti maðurinn í sögu NBA til að koma með að minnsta kosti 35 stig, 10 stoðsendingar og átta þrista af bekknum.

  • Úrslitin í NBA-deildinni í nótt:
  • Toronto Raptors - Brooklyn Nets 103-116
  • Golden State Warriors - Houston Rockets 120-107
  • Sacramento Kings - Indiana Pacers 91-94
  • Washington Wizards - Milwaukee Bucks 101-94
  • Los Angeles Clippers - Charlotte Hornets 120-106
  • Oklahoma City Thunder - San Antonio Spurs 99-94
  • Orlando Magic - Utah Jazz 107-100
  • New York Knicks - Cleveland Cavaliers 109-126

NBA



Fleiri fréttir

Sjá meira


×