Meiddist á lokamínútu æfingarinnar

Kovacic verður frá keppni næstu vikurnar eftir að hafa meiðst í læri á æfingu Chelsea í gær. „Þetta er mjög grátlegt. Hann meiddist á síðustu mínútu æfingarinnar, tognaði í læri, og verður frá í einhverjar vikur,“ sagði Thomas Tuchel, stjóri Chelsea.

Tuchel vonast til að Kovacic verði klár í slaginn þegar Chelsea sækir Leicester heim 20. nóvember, að loknu hléi vegna landsleikja. Þeir Lukaku, Werner og Pulisic gætu einnig snúið til baka þá en mögulegt er að Pulisic verði með gegn Burnley 6. nóvember.

Chelsea mætir hinu nýríka félagi Newcastle á morgun en þá verða varnarmennirnir Cesar Azpilicueta og Andreas Christensen aftur á móti til taks á nýjan leik eftir meiðsli.